Santosh Trophy khel tur Mizoram chhuak ta
Nimin khan Mizoram team-in Santosh Trophy final round khel turin Mizoram an chhuahsan. India rama football hmanga state inelna lian ber hi Goa-ah March 12 aṭangin khelh ṭan a ni ang.
Manipur hnehtu
Mizoram hian team 10 awmna final round khel turin January thla tir khan Shillong-ah Tripura 6-0 in an sawp a, group match hnuhnung berah Manipur 2-1 in an hneh bawk.
India hmarchhaka football thiam ber chu Manipur tiin an sawi ṭhin a, tunah chuan lal thar awm tawhin Mizoramin record an nei ṭha zawk.
Kum 2014 khan Mizoram hian Manipur hnehin final round an lut a, a vawi khat nan Santosh Trophy nomawi an chawi bawk. Mizoram hian qualifier hnuhnung pali an paltlang vek a, he hlawhtlinna chang tur hian Manipur vawi thum an hneh.
An inthuam ṭha?
Final round luh theihna tura Mizoram tana goal hnih khungtu Lalmuanzova a inhliam a, I Day Football 2016 best player Zosangliana Sailo (Chhaia) khup hliam a dam thei lo bawk.
Chanmari FC winger Muanzova leh Ramhlun North FC midfielder Chhaia te hi 2014 Santosh Trophy champion ṭuma player pawimawh Lalfakzuala leh F. Lalrinpuia ten an thlak.
Armed Veng tlangval Fakzuala hian Captain NM Gupta Trophy-a Mizoram team hi a champion pui nghal a, final-ah goal awmchhun khungin hero of the match-ah thlan a ni.
Republic Veng tlangval Valpuia erawh Silchar-a inelna neihah hian a tel ve lo a, amaherawhchu Mizoram Police striker hian training a zawm hma tho avangin coach Lalsangzuala Hmar game plan-ah player pawimawh a ni ang.
Mizoram hian qualifier-a an chhawr rim Ramhlun North FC keeper Liansangpuia thlak nan Chanmari West keeper Lalruatpuia an lalut bawk. Coach Sanga chhawr theih turin F. Lalmuanawma a awm tho a, Chanmari FC keeper hi final round atana inpuahchahna NM Gupta Football-ah best goalkeeper a ni.
Vawi riat chak
Mizoram team hi qualifier-a vawi hnih an chak hnuah NM Gupta Football-ah vawi ruk khelin an chak vek. Match zawnin vawi riat an chak tawh a, goal 21 khungin goal thum chauh an chhuah.
Final Round-ah hian Mizoram group-ah Kerala, Maharashtra, Punjab leh Railways te an awm a, an recod duhawm chhunzawm hi a awlsam dawn lo.
Mizoram hian nikum khan Railways an draw avang leh Maharashtra an ngam loh avangin semifinal an lut pha lo.
Kum 2015 khan Mizoramin Kerala hi goal khatin an hneh hram a, chak lo zawk Kerala pawh hian semifinal an lut tho. Hemi ṭum hian champion lai Mizoram chu semifinal-ah a thlengtu Punjab penalty-a hneh loin an tla.
Santosh Trophy-ah Mizoram hi kum 2014 khan a vawi khat nan an champion a, hemi hnu hian final an lut leh tawh lo.
Beiseina nen
I League-ah Mizo player 50 bawr vel an inziak lut a, I League Second Division khel Mizo player ṭha an awm nual bawk. Mizoram team hi MPL5-a player ṭha thlan khawm an ni lo a, mah se Mizoram team hian champion ngei tumin Goa-a an pan.
Mizoram coach Sanga chuan, "Team work kan hmachhuan ber a, qualifying leh NM Gupta tournament-ah kan theihna kan tilang tawh bawk a, champion ngei kan tum a ni," a ti.
Mizoram manager Lalthanzama Vanchhawng chuan, "Player tam zawk leh coaching staff te tan chuan Santosh Trophy hi kan vawi khat hmachhawnna a ni a, kan phur khawp mai. Chak duhna thinlung tak tak kan nei a, training-naah kan serious a, beiseina ka nei sang hle," tiin Vanglaini palai a hrilh.
MFA Registration Committee-a vice chairman ni lai Zama chuan, "Mizo mipuite min ṭawngṭaipui turin ka ngen a ni. MFA-in min duat a, Kolkata thleng min thlawhtir avangin kan lawm bawk," tiin a sawi.
Nimin zing khan MFA Office-ah Evan Lallungmuana'n Mizoram team hi ṭawngṭaina nen a thlah a ni.