All England khel tur Saina a inpeih

Khawvela badmintion tournament upa ber All England Championship chu vawiin aṭangin Birmingham-ah khelh ṭan a ni tawh dawn. World number 1 hlui Saina Nehwal chuan inelna hmachhawn tura a inpeih thu a sawi.

Indian shuttler zingah PV Sindhu-i mentor leh chief coach nilai Pullela Gopichand leh legend Prakash Padukone te chiah hi All England champion thei an la ni a, kum 2015 khan Saina chuan champion theihna hun nei mah se Rio Olympic champion Carolina Marin a hneh lo.

Kum 26-a upa Saina chuan, "Ka thiltum pakhat chu khawvela badminton player ṭha berte zinga mi nih a ni a, player ṭha bik tak tak te nena inelna hmachhawn a hnehna changtu ni thei turin ka inbuatsaih mek," a ti.

Hyderabad nula Saina hian 2012 London Olympic-ah khan bronze medal a la a, Indian hmei­chhe shuttler zinga Olympic badmintion inelna bika medal la thei hmasa ber a ni.

Saina chuan, "All England-ah hian kum 2015 khan pahnihna ka lo ni tawh. Marin khan a khel ṭha em em a, min hneh bawk. Tunah chuan ka khup hliam a dam tawh a, inbuatsaihna ka neih ṭhat bawk avang­in huphurh ka nei lo," tiin a sawi.

Saina hian a match hmasa berah Japanese shuttler Nozomi Okuhara a hmachhawn ang.