Striker lansarh zanah Spurs leh City chak

Pathianni zan Premier League-ah striker langsar Harry Kane, Romelu Lukaku leh Sergio Aguero ten goal an khung a, Kane leh Aguero ten an team hnehna an chanpui laiin Everton tana Premier League goal khung hnem ber dinhmun a luah zanah Lukaku-a'n a team tan point thum a hlawh chhuak zo lo.

Spurs-in Everton an mikhual zanah Harry Kane chuan goal hnih khungin London club hi 3-2 in hnehna a chanpui a, kum 2017-ah inelna hrang hrangah match 12 khelin goal 14 a khung tawh. Gabriel Jesus inhliam hnuah Sergio Aguero-a'n City tana khelh a phu zia a lantir nawn zel a, khualmuala Sunderland 2-0 a an hnehna inkhelah goal a khung - a match hnuhnung pathuma goal nga a khungna chiah a ni.

Kane vs Lukaku

White Hart Lane-a Tottenham-in Everton an mikhual hmaa sawi hlawh ber chu Kane leh Lukaku an ni a, striker pahnih hian Pathianni zana an intawn hma hian league-ah goal 17 ve ve khungin assist pali ve ve an nei bawk - Spurs khelmuala chungnung zawk erawh mual neitu tlangval Kane a ni.

English striker hian minute 20-na lekah yard 20 vela hla

aṭangin goal ropui a khung a, minute 56-naah an goal hnihna a khung bawk - Premier League-ah goal 19 khungin top scorer a ni mek. Minute 80 hmalam zawng hmuh tur a awm loh hnuah Lukaku a inlar ve thung a, Belgian striker hian Kevin Mirallas ball pek chu an si phurh sut ṭhen nan a hmang - Merseyside club tan league match bika a goal 61 na niin Premier League-ah Toffees tan ani aia goal khung hnem an awm lo.

Mahse, Lukaku record siamin awmzia a nei lo. Spurs tan Dele Alli chuan Harry Winks free kick aṭanga ball kal chu injury time-ah a khung a, a hnu lawkah Everton tan substitute Enner Valencia-a'n goal khat khung ve leh mah se a tlai tawh, 3-1 in an tlawm.

Nomawi beiseina

Tottenham-in Premier League table-a pahnihna dinhmun an sawhnghet zel a, hmahruaitu Chelsea an um zel. Spurs boss Mauricio Pochettino chuan, "Thil pawimawh ber chu khelmualah kan beiseina lantir a ni a, chu chu zaninah khan kan ti a ni. Kan kutah nomawi a innghat tawh lo tih ka hria a, mah se Blues chetsual hun thlir chunga chesual lo tura kan beih zel a ṭul a ni," a ti.

Pochettino chuan a striker Kane fak nghalin, "Kane chet

ṭhat chhan chu a thawhrim vang a ni. Team-in training session kan neih piah lamah amahin a bei ṭauh ṭauh peih a, a thawhrim rah chu khelmualah hmuh turin a awm a ni," tiin che ṭha tura Kane thawhrim thu a sawi.

City chakna Aguero

Sunderland khelmualah Manchester City an lenglut a, Pep Guardiola-a'n champion nomawi an beisei ngam tawh loh thu sawi mah se season tharah Champions League khel lo thei an nih miau avangin inthlahdah thei an ni lo - tlak hlauhawm dinhmuna ding Sunderland chu 2-0 in an hneh.

City tan minute 42-naah Sergio Aguero a inlar a, Raheem Sterling ball pek chu hnai set sawt aṭangin a khung. Black Cats keeper Jordan Pickford chuan goal ngei tur nia ngaih ṭha zetin a dan sak bawk - Argentine striker hian match ruk zet goal a khung loh hnuah match thum chhungin goal nga a khung tling ta. A thiam a la theihnghilh lo - Premier League-a khualmuala goal 50 khung thei player 21 zingah a tel ve chiah bawk.

Chawlhlawk hman a nih hnuah City-in goal an khung chhunzawm a, David Silva ball siamsak chu German winger Leroy Sane-a'n minute 59-naah a khung. Sunderland tan Jermain Defoe chuan goal khat khung ve mah se offside vangin pawm a ni lo a, vawi khat post a pet per bawk. Fabio Borini chuan an hun ṭha neih a chhawr ṭangkai thei lo bawk a, table mawngphah luahtu Black Cats dinhmun a chhe ta hle.

Manager thukhawchang

Manchester City manager Pep Guardiola chuan, "Goal ṭha tak khungin hma kan hruai a, khualmuala khel kan nih avangin chawlhlawk hmaa goal khung kha a pawimawh a ni," a ti a, rawlthar duhawm Sane fak nghalin, "Leroy Sane hian nitinin hma a sawn a a, kum 21 chauha upa a la nih avangin a hmabak a eng hle. Player fing leh fel tak a ni a, a theihna tak tak a pholan theih nan kan pui zel dawn a ni," tiin a sawi.

Sunderland manager David Moyes chuan, "Buai chang nei ṭhin mah ila ka player-te dem theih an ni lo a, an theihna zawng zawng an pe a ni. Ka naute hian kan dinhmun an hrethiam tlangin ka ring a, mah se kan chi ai lo. Kan hmaah match tam tak a la awm a, kan theihna nen kan khelh a ṭul dawn a ni," tiin season tawpa tla turah a indah phal lo.