Real hmachhawn tur Napoli inpeih

Champions League sulhnu nei ṭha ber leh nomawi kawltu ni bawk Real Madrid chu zanin dar 1:15 hian last 16 second leg khel turin Napoli khel­mualah an lenglut dawn. Inkhel dangah Arse­nal-in khualmuala 5-1 zeta an hneh tawh loh Bayern Mu­nich an mikhual bawk ang.

February 14 khan San­tiago Bernabeu-ah Real Madrid-in Karim Benzema, Toni Kroos leh Casemiro te goal hmangin Napoli 3-1 in an hneh - Italian club tan quarterfinal lut tur chuan a tlem berah goal hnih tal an khung a ngai dawn a ni.

Real an inkhek

Zinedine Zidane-a'n Italy an pan dawn tih hre ran chungin kartawp La Liga inkhela Eibar 4-1 a an sawp ṭumin Dani Carvajal, Marcelo leh Toni Kroos te a hahchawlhtir a, hliam tenau nei Cristiano Ronaldo bakah hrem tuar Gareth Bale an inlan lo bawk - player langsar pangate hian Napoli an hmachhawn thei vek dawn a ni.

Ronaldo-a'n Real Ma­drid tan Champions League knock out stage bikah match 38 a khelh aṭangin goal 34 a khung thei. Mahse, Portuguese forward hian Europe-a club inelna sang berah hian minute 523 chhung goal a khung tawh lo - Real thiampuipa hian goal khung hnem record a neih sa goal 95 belhchhah a tum dawn.

Napoli inpeih

Napoli-in Juventus laka Gonzalo Higuain an chan hnuah a thlak nan pound maktaduai 28.93 man Arkadiusz Milik an lalut a, kum 22-a upa striker hian Napoli tan inelna hrang hranga match 14 a khelh hmasak aṭangin goal sarih a khung nghal. Mahse, Poland international hi nikum October thla khan a khup a hliam a, tunah erawh a dam tawh.

Napoli hian kartawp Serie A inkhelah an chunga awm AS Roma chu Dries Mertens goal hnih hmangin 2-1 in an hneh a, minute 79-naah Milik chu luhtir niin Marek Hamsik a rawn thlak - Real Madrid hmachhawn turin a inpeih tawh.

Season hmasa Serie A pahnihna Napoli hian Champions League last 16 an vawi hnih khelhna chauh a ni a, 2011-12 season khan Chelsea 4-1 in an ngam lo. Kumin hian Real Madrid an lehthal thei a nih chuan an club chanchina bungthar an kai ang.

Arsenal tlak zan ?

Arsenal chuan zaninah Emirates Stadium-ah mak thlentir an tum dawn. Liverpool laka 3-1 zeta chak lo hlim Gunners tan Bayern Munich lama goal li tal thun hi theih loh a ni lo a, hmabak harsa tak erawh a ni.

Arsenal hi a zawnin season ruk chhung chu Champions League last 16 aṭanga pet chhuah an ni tawh a, an record duhawm lo thaibo turin Alexis Sanchez chet ṭhat a pawimawh ang - Chile international hi kartawp inkhela Liverpool an ngam loh ṭumin bench aṭanga luhtir a ni.

Carlo Ancelotti enkawl Bayern hian kartawp Bundesliga inkhelah Cologne 3-0 in an hneh a, league table-ah point sarihin an sang fal tawh. Tun dinhmunah defender Jerome Boateng chiah player langsar zingah inkhel thei lo a awm.

Tawnhriat ngah Franck Ribery hliam a dam tawh a, France international hlui hian match hnih khel leh tawhin goal khat a khung bakah assist vawi hnih a nei leh tawh - Gunners tlarhnung tana buaipui tham a tling ang. Bayern hian 2004-05, 2012-13 leh 2013-14 season-ah Arsenal hi last 16-ah hmachhawnin hnehna an chang vek.