Khualmualah Aizawl FC fiahna
Aizawl FC-in zanin dar 7:05 hian Balewadi Stadium-ah DSK Shivajians an bitum dawn.
Khalid Jamil-a hoten RG Stadium, Mualpuiah result ṭha an nei a, khualmualah fiahin an awm ang.
Vawiin tlai dar 4:35 hian league hmahruaitu East Bengal-in Barasat Stadium-ah Churchill Brothers an mikhual dawn a, inkhel pahnih hi Ten 2-ah a en theih ang.
DSK an chau!
Pathianni zanah DSK Shivajians-in khualmualah Chennai City FC an hmachhawn. Chennai khawpuiah Haroon Fakhruddin Amiri hmanga mualneitu hmahruaina chu injury time-a Shane Mc Faul-a goal hmangin DSK-in an sut hram.
Dave Rogers-a hote nimin khan Pune-ah an let a, zaninah Aizawl FC an mikhual nghal dawn. DSK Shivajians hi mahni muala khel tur ni mah se fixture fuh tawk loh vangin an dinhmun a ṭha lo zawk a, Aizawl FC tan chanchin hriat nuam a ni.
Khualmualah chuan...
Aizawl FC hian match 12 an khelh tawh aṭangin point 26 an hlawh chhuak a, heng zinga point 22 hi Mizoram chhunga an hlawhchhuah a ni. Mizo club hian khualmualah match li khelin point li chauh an la hlawh chhuak a, match khat apianga point khat hlawh chhuak ang zel chauh an ni.
Khalid Jamil-a hote hian an match hmasa bera East Bengal laka point khat an hlawhchhuah hnuah Mumbai FC hneh mah se khualmuala an match hnuhnung pahnihah Chennai City leh Mohun Bagan an hneh lo.
Hetihlai hian a êng zawnga thlir chuan Aizawl FC hian match hnuhnung pathumah hnehna an chang tawh a, season liam ta khan DSK Shivajians hi RG Stadium-a an hneh hnuah Pune-a inkhel pawimawh takah an hneh leh bawk. Mizo club an hneh loh avangin DSK hi season liam ta khan table mawngphahah an awm a, Federation Cup an khel ve lo.
Tute nge zin?
DSK Shivajians hmachhawn turin Mumbai FC an hneh
ṭuma player 18 bakah Lalhriatrenga (Achia) leh Lalramhmunmawia (Te-a) te an zin tel a, defender Lalruatthara chu inhliam vangin a la tel thei lo.
AFC coach Khalid Jamil chuan, "DSK Shivajians chiah ka ngaihtuah a, he inkhelah hian kan theihna zawng zawng kan chhuah a ngai a ni," tiin inkhel pawimawhna a hrechiang hle.
Hmahruaitu East Bengal
Tlai dar 4:35-a East Bengal an khelh dawn avangin Kolkata club-in dinhmun sawhngheh theihna hun ṭha an nei a, an khingpui tur Churchill Brothers erawh zuam chi an ni lo.
Churchill Brothers hian an match hnuhnung berah Mohun Bagan 2-1 in an hneh. Trinidadian forward Anthony Anton Wolfe chet ṭhat lai a ni a, Goan club hi Red and Gold barakhaih thei dinhmunah an ding.
East Bengal hian Goa-ah Churchill Brothers 2-0 in an hneh a, hemi ṭum hian Lalrindika Ralte chuan corner kick aṭangin a pet goal a, amaherawhchu offical lamin defender Ivan Bukenya khung angin an ziak lut.