David Haye an zai

British boxer David Haye chu Tony Bellew laka a tlawm hnu lawkah zai a ni. Kum 36-a upa boxer hian Bellew nen an inhnek laiin round ruknaah a ke a tina a, he a ke na hi inhnek hma karin Germany-ah entir tawhin nimin khan zai a ni ta a ni. Haye hi round 11 thleng inkhelh chhunzawm thei mah se a aiawh ten towel vawm lutin WBA heavy­weight champion hlui hi a tlawm zawkah a ṭang.

Haye aiawhte chuan thuchhuah siam nghalin, "David chuan amah thlawptute zawng zawng chungah lawmthu a sawi a, duat taka enkawltu dam­dawi In staff-te chung­ah pawh a lawm takzet a ni," an ti. Haye hian mipuiin an hmu leh duh a nih phawt chuan Bellew a hmachhawn leh tur thu a lo sawi tawh bawk.

WBC cruiserweight champion Bellew hian Haye nen an inhma­chhawnnaah hian a kutah hliam a tuar ve tho a, mah se kum 34-a upa chuan hliam tenau a nih thu a sawi. Bellew chuan Haye nena an inhnek chungchang sawi nghalin, "Haye khan hliam a tawrh tawh avangin tlawm mai turin ka hrilh a, mah se a lu kha a thing tlat si a ni," a ti.

Hetihlai hian Bellew-a promoter Eddie Hearn chuan WBC heavyweight champion Deontay Wilder leh WBO champion Joseph Parker ten a boxer chu hmachhawn duha an biak tawh thu sawiin, "Tony hian thutlukna pawimawh tak a siam a ṭul dawn. Cruiserweight-ah a cham chhunzawm zel dawn nge, David Haye a hmachhawn leh dawn tihah pawh thil chiang a awm lo. Mahse, kei chuan heavyweight-ah a luh chhoh ka ring ber," tiin a sawi.