Atletico-in Valencia an sawp

Tun season-a beisei phak lo Atletico Madrid-in Champions League tal khelh phak tumin hmalam an pan ve zel a, Pathianni zan khan Valencia chu 3-0 a sawpin palina dinhmun an luah ve leh ta. Atletico hi table-ah palina an ni mek a, palina ni chunga season an khar a nih chuan Champions League khel tura playoff an khelh a ngai ang a, pathumna an ni phak a nih erawh chuan direct-in an tling thung ang.

Atletico tan Antoine Griezmann chuan inkhel ṭan aṭanga minute 10-na lekah goal hmahruai a khung a, Koke through ball pek chu ṭha taka umin a khung chiang hle. Atletico-in Valencia goal rumṭhaih chhunzawm mah se goal dang erawh an khung lawk thei lo a, 1-0 a hma hruai chungin chawlhlawk an hmang.

Second half ṭan a nih aṭanga minute thumna lekah Atletico-in goal an khung chhunzawm a, hun ṭha vawi tam a hlah hnuah Kevin Gameiro-a'n a hlah nawn tawh lo. Hun tawp nan minute sarih chiah a awm tawh tihin Atletico bawk an inlar nawn a, Thomas Partey ball lak per chu Griezmann-a'n nang fuhin a goal hnihna ni turin a khung - French forward hian tun season-ah goal 20 a khung tling leh der tawh.

Simeone-a'n a duhkhawp lo

Atletico boss Diego Simeone-a'n hnehna chang mah se a la duhkhawp lo. Argentine manager chuan, "Ningani zana Deportivo La Coruna nen kan in­hnehtawk hnuah kan tihtur dik tak kan ti a, rilru huaisen tak pu chungin kan game dik tak kan khel chhuak a ni. First half-ah khan goal tam zawk erawh khung thei kan ni. Barcelona kan hneh lo tih loh kha chu kan khel ṭha em em zel a, match tinah team ṭha zawk nih zel hi kan tum chu a ni a, kan khelh leh tur apaing hi final ang maia kan khelh zel a ngai dawn a ni," a ti.

Simeone-a tan Valencia an hma­chhawnna inkhel hi Atletico match 200 a kaihhruaina a ni a, hnehna nena a lawm thei chu a hlim hle. Player a nih laia Atletico tana khel ṭhin Simeone chuan, "He club hi match 200 zet ka kaihruai thei ang tih hi ka suangtuah phak ngai lo. Vawiina ka dinhmunah hian ka hlimin ka lawm takzet a, kum nga chhung zet harsatna karah pawh huaisen taka khel ṭhin players ka nei hi ka lawm a ni. Vawiinah pawh he team hi kan inlungrual a ni tih an pholang a, kan chhunzawm zel ka beisei," tiin hma hun eng takin a thlir.

Torres a dam tawh

Atletico Madrid striker Fernando Torres chuan a club-in Valencia an sawp lai hi a hmunah a en. Spanish striker hi Ninga­ni zana Dportivo nen an inkhelh ṭumin Alex Bergantinos nena ball an inchuhna lamah a chesual a, khelmual chhungah biak theih a nih loh avangin fans leh player-te an hlauthawng hman hle.

Liverpool striker hlui hi damdawi Inah hruai nghal a ni a, a inkhel result aiin Torres-a chanchinin sawi leh ngaihven a hlawh zawk. Mahse, Chelsea tan pawha lo khel tawh striker hi enfiah a nih hnuah hliam na engmah a nei lo tih hmuhchhuah a ni a, damdawi Ina zan khat a riah hnuah chhuahtir a ni.

Kum 32-a upa striker hian club tan la khel thei lo mah se mipui zingah ṭhuin Atletico chak lai hi a en a, Atletico khelmuala pungkhawm fan-ten an club fapa rangkachak hi an lo lawm hle. Torres-a jersey number 9 nena inrem turin minute kuanaah Torres pual hian hla an sa a, banner tam tak phochhuah a ni bawk.