Chelsea an kal fawr

London Stadium-ah Chelsea-in Eden Hazard leh Diego Costa te goal hmangin West Ham 2-1 in an hneh.

Antonio Conte hote hian match 27 khelhah point 66 an hmu a, Premier League hmahruaitu Blues hian vawi 11 khelh tur la awmah anmahni hnaih bertu Tottenham Hotspurs aiin point 10 in an hmu tam zawk.

Blues an tlo
West Ham-in an mualah feet ruk leh inches lia sang Andy Carroll hmangin nawr an tum tih chu rinlawk dan a ni a, Chelsea manager Antonio Conte erawhin awmze neiin game plan a siam. England forward palian hi Italian manager nauten an dah ṭha.

Goal nawr kawngah Chelsea-in tum dan chiang tak an nei bawk a, Conte-a'n Eden Hazard theihna san zia a hrechiang a, N'Golo Kante theihna a hmuh hmaih lo a, Italian manager hian a player-te an ṭhat theih dan ber zelin a hmang.

West Ham midfielder Robert Snod­grass ball pekah Kante tlazepin French midfielder hian Hazard a pe nghal. Belgian winger hian chak takin ball a la chhuak a, Pedro nen wall pass an neih hnuah Hazard-a'n a pet goal. Goal khatna hi minute 25-naah a lut a, minute 50-naah Hazard-a corner pet chu Costa-a'n a malpuiin a ti goal leh bawk.

Hammers-in goal hnih an chhuah hnuah an nawr let na a, Sofiane Feghouli goal khung tur chu Thibaut Courtois-a'n a dan sak. Manuel Lanzini volley chu Chelsea wing-back Marcos Alonso kutah per mah se referee Andre Marriner-a'n a hmuh kan.

Injury time-ah Andre Ayew-a'n Spanish midfielder Cesc Fabregas ball a chhuhsak hnuah Lanzini a pe a, Argentine midfielder hian goal-ah chantir mah se point hlawh chhuak turin goal dang khungna hun a awm tawh lo.

Chak an phu
West Ham manager Slaven Bilic chuan, "Chak an phu zawk a ni. Chelsea hneh tur chuan an tihsual kan chan a ngai a, kan hman ṭangkai a ngai bawk. Chutihrualin thil thlen dan a letling zawng a ni a, kan tihsual an hman

ṭangkai si chuan thawhchhuah a harsa tawh a ni. Kan tihsual tih loah chuan kan khelh danah ka lawm a, an goal hnihna pawh kan tihsual tho a ni. Dik taka sawi chuan an counter attack zawng zawng a hlauhawm a ni," tiin hun pawimawha tisual ve lo Chelsea-in chak an phu a tih thu a sawi.

Chak kan phu
Chelsea boss Antonio Conte chuan, "Ka ngaihdan chuan ṭha takin kan khel a, inkhel kan thunun a, goal kan chhuah erawh pawi ka ti. Clean sheet theihna tura goal chhuah hi ka duh dan a ni lo. Hemi kawngah hian kan insiamṭhat a ṭul a, inkhel pumpuia thlir erawh chuan ka lungawi," tiin chak an phu thu a sawi.

Kante chungchang sawiin Conte chuan, "N'Golo Kante hian tha a ngah bik a, a tlan tam avangin hmun tin a uap hneh a, nasa takin hma a sawn bawk," tiin French midfielder a fak.

London Stadium-ah Chelsea ṭan­tuten, "League-ah kan champion dawn," tiin an zai rual a, Italian manager Conte erawhin, "Kan khelh hmabakah point 26 kan hlawh chhuak tur a ni a, a tlachawp zelin kan hmalam hun kan thlir ang. Thui tak thlir chu a ṭha a, chutihrualin kan awmna hmun kan hriat chian a ṭul a ni," tiin an la champion loh thu a sawi.

Chelsea hi league bakah FA Cup cham­pion thei dinhmunah an ding a, March 13 zanah Man­chester United nen FA Cup quarterfinal-ah an inhmachhawn ang.