India an chak

India-in Chinnaswamy Stadium, Ben­galuru-ah Australia chu run 112-ah an vawm hlum vek a, second Test-ah run 75-in an chak. Ti hian series-ah ram pahnih hi 1-1 in an inhnehtawk chiah.

Mualneitu India hian an bat hmasa a, KL Rahul-a'n run 90 zet a siam, midangin an thlawp ṭha lo 1st innings-ah run 189 chiah an siam. Australia bat hun a thleng a, Matt Renshaw (60) leh Shaun Marsh (66) ten half century an siam bakah David Warner (33) leh Matthew Wade (40) ten run 30 an siam tling a, run 276 an vaw chhuak.

2nd Innings-ah KL Rahul-a'n run 51 a vaw chhuak leh a, India opener out hnuah Cheteshwar Pujara (92) leh Ajinkya Rahane (52) ten dinhmun ṭha zawkah mualneitu hi an hlang kai. India hian run 274 an siam a, Australia-in chak turin run 188 an mamawh.

Australia tan chak theihna tur ni mah se mimala che ṭha an awm tawh lo a, India bowler Ravichandran Ashwin erawh a khel ṭha hle. Tamil Nadu bowler hian wicket ruk lain run 41 chiah a pe. Australia hian 2nd innings-ah hian run 112 chiah an tlin a, Inda hi run 75 in an chak.

Australia coach Steve Smith chuan, "Test Match chinchhiahtlak tak a ni a, kan tum angin khel chhuak lo mah ila ka ṭhiante khelh danah ka lungawi," tiin a sawi.

India captain Virat Kohli chuan, "First Test-a kan chak loh hnuah thawhchhuah ngei kan duh. Run 150 aia tam target kan siam sak theih chuan an buai phak kan ring a, kan tifuh ta a ni," tiin an hnehna chan chungchang a sawi.

India leh Australia hian test match vawi li an khel dawn a, vawi thumna chu March 16, Ningani khian Ranchi-ah khelh a ni ang.