Kolkata club ngam loh Churchill Brothers

Mohun Bagan an hneh hnu lawkah Churchill Brothers chuan nizan khan khualmualah East Bengal chu 2-1 in an hneh a, Kolkata club lian I League nomawi beiseina kalkawng an dalsak - nizan khan Aizawl FC leh DSK Shivajians inkhelin an result kan hre hman lo a, Aizawl hian draw result chauh an hlawh chhuak a nih pawn head-to-head ah East Bengal laka an chungnun avangin hmahruaitu an ni ang.

Coach thar Derrick Pereira enkawlna hnuaia harhtharna chang mek Churchill Brothers players khelmualah an inlungrual tih a lang a, player langsar nei lo chunga first half-a inkhel thununtu chu Goan club hi an ni. Inkhel ṭan aṭanga minute sarihna lekah Anthony Wolfe chuan defender Anwar Ali leh goalkeeper Rehenesh TP chetsual nangchingin goal hmahruai a khung a, Barasat Stadium-a East Bengal fan-te a ngawihtir.

Minute 34-na a ni a, beisei loh zawk Churchill bawkin goal an khung. Goan club tan Wolfe chuan East Bengal defending chhiat zarzoin Ansumana Kromah tan a siamsak a, Liberian striker hian goalkeeper Rehenesh TP a bum hnuah hahdam takin a khung. Goal dang lut loin chawlhlawk hman a ni a, Kolkata khawpuiah East Bengal an hawihai.

Robert Lalthlamuana'n captain armband a hren zanah Lalrindika Ralte chu bench-ah dah ni mah se Trevor Morgan-a'n an dinhmun a him lo tih hriain minute 51-naah Lunglei tlangval a luhtir a, Kolkata club inkhel a nung sawt. Didika'n corner aṭanga goal hlauhawm a neih hnuah East Bengal-in goal an khung ta nge nge a, minute 67-naah Chris Payne chuan Robin Singh siamsak a tlawh lut.

East Bengal-in point hlawhchhuah ngei tumin nawr chhunzawm mah se Goan club an ṭang tluan a, East Bengal an chelh ding.