MFA Cup 2017 ; Ngaihven hlawh Champhai Vs Lunglei
MFA Cup vawi 17-na semifinal chu vawiin hian Ṭhuamluaia Mual, Lungleiah khelh a ni dawn a, Zonet Zawlbuk-ah live-in a en theih ang.
Chawhma dar 11:30-ah Champhai club Bethel FC leh Lunglei club Bazar Veng FC an inkhel ang a; chawhnu dar 1:30-ah Kolasib club Project FC leh Aizawl club Mizoram Police FC an inhmachhawn ang.
Team ṭha ber?
Bethel FC hi group stage an khelh dan thlir aṭanga team ṭha ber chu an ni a, Champhai khaw club hian goal 16 khungin goal an chhuah lo.
MPL-a tawnhriat nei ṭha Isaac Lalrinngheta'n match tinah goal khungin goal riat a khung tawh. Midfield-ah MPL-a inlan tawh H. Zonunthara leh Kaleba Lalnunhlima te an nei a, tlarhnungah MPL5-a Chanmari FC champion puitu Lalmuanawma'n a ho thei bawk.
Bethel FC coach Lalbulliana chuan, "Kan record ṭha hi semifinal-a chhawm nun kan duh a, Lunglei club kan hmachhawn dawn avangin a awlsam lo ang," tiin Vanglaini palai hrilh.
Lunglei club Bazar Veng FC-in AIFF Academy player panga ngawt an nei a, match tina an thawhhona a ṭhat zel avangin hma an sawn a, an result-ah a lang chhuak. Bazar Veng hian an match hmasa berah Project FC hneh lo mah se FC College Vaih leh Hmar Veng FC hnehin semifinal an lut.
Bazar Veng manager Jonathan Lalrindika chuan, "Bethel FC hi team ṭha tak an ni a, amaherawhchu mipui ṭawiawmna nen kan hneh theih ngei ka beisei," tiin Champhai club an hneh theih thu a sawi.
Lunglei club tan Edmund Lalrindika'n goal thum a khung tawh a, AIFF Academy lama a awmpui Lalengzama Vangchhia, B. Lalnuntluanga, B. Rohmingthanga leh Lalliansanga-te team tan an ṭangkai bawk.
Hliam tuar Police
Mizoram Police-in Santosh Trophy khel turin an rinrawl paruk an thawh a, Aizawl FC-in midfielder V. Lalṭanpuia an hawhsak bawk. Inhliam vangin Lalnunmawia'n Lunglei a pan ve lo a, TC Vanlalhruaia hrem vangin a inlan dawn lo a, training-naa inhliam Lallawmzuala'n Kolasib club a hmachhawn ve thei dawn lo.
Mizoram Police manager B. Lalneihsanga chuan, "Vanneih leh vanduaiah kan innghat a, Kolasib hi kan hlau lo a, chak tur erawh chuan kan vanneih a ngai ang" tiin a player neih dan a hre chiang hle.
Project FC hian an khingpui an la hneh vek a, goal li zet an chhuah avangin an tlarhnung erawh a phui ṭha tawk lo. Kolasib club hian tlar hmaah veteran forward F. Lalnunhlua (Valtea), Ricky Zonunmawia leh Andy Lalrinpuia te an nei a, semifinal-ah hian Chanmari West forward hlui Lalhmangaihzuala'n a zawm dawn bawk.
Kolasib club coach Joseph Zoremsanga chuan, "Police ṭha ber kan hmachhawn dawn lo a, hei vang hian final luh kan inbeisei khawp mai. Kan thlenna Rahsi Veng kan chungah an ṭha a, kan lawm takzet a ni," tiin Vanglaini palai a hrilh.
MFA Cup hi District FA hnuaia club champion te inelna a ni a, final hi March 10, Zirtawpni hian khelh a ni ang.
Semifinal - Vawiin Inkhel Tur
11:30 AM Bethel FC Vs Bazar Veng FC
01:30 PM Project FC Vs Mizoram Police FC