Man City tan chak loh a thiang tawh lo - Pep

Pep Guardiola chuan Manchester City-in tun season-a league nomawi beisei turin point hloh a thiang tawh lo tih a sawi. Zanin dar 1:30 hian City-in Etihad Stadium-ah Stoke City an mikhual dawn a, Star Sports Select HD2-ah a en theih ang.

Manchester City hian Premier League hmahruaitu Chelsea point 11 in an pha lo a, match khata an khelh tlem avangin zanina an chak a nih chuan Blues nena an inthlauhna hi point riat chiah a ni tawh ang.

City boss Pep Guardiola chuan, "Chelsea nena kan inthlauhna tam ta lutuk hi a zia lo lam hret a ni a, amaherawhchu thil awm dan kan pawm thiam a ṭul. Season ṭan nan a zawnin match 10 kan chak a, khah tih laia point kan hmuh tam chhan kha kan khelh ṭhat vang a ni," tiin season bul an ṭan ṭhat thu a sawi chhuak.

Chak a pawimawh thu sawi chhunzawmin Spanish manager Pep chuan, "Tunah chuan March kan thleng tawh a, champion turin chak loh a thiang tawh lo. Chak chuan beisei kan nei chhunzawm ang a, chak loh chuan nomawi inchuh zingah kan tel lo ang. Tunah chuan league-ah Champions League leh knockout inelna ang thoin chak loh chuan champion beiseina a bo dawn a, player leh club in kan dinhmun hi kan hrechiang hle," tiin a sawi.

Manchester City hian Pathianni zan khan Sunderland 2-0 in a hneh a, Sergio Aguero leh Leroy Sane ten goal an khung. Brazilian forward Gabriel Jesus inhliam laiin Argentine forward Aguero-a'n a theihna a pho chhuak leh tawh a, Spanish midfielder David Silva a la tar lo bawk.

Sunderland an hneh zawhah Pep chuan, "Spain-a ka awm lai khan Valencia tan a khel ṭhin a, player danglam a ni tih ka hmu tawh. Helai hmuna ka rawn kal chhan pakhat chu ani nena thawhdun hi ka châk a, kan thawkho thei hi ka lawm hle," tiin a player chungchang chhuang takin a sawi.

City hian season ṭantirh khan Stoke City hi khualmualah 4-1 in an hneh tawh a, FA Cup-a Huddersfield nen goal awm loa an inhnehtawk hnuah match hnuhnung pathumah goal 12 an khung tawh.

Stoke City hi Tottenham laka 0-4 zeta an mualpho hnuah Inrinni khan Middlesbrough 2-0 in an hneh. Hemi ṭum hian Marko Arnautovic-a'n goal hnih a khung. Stoke boss Mark Hughes chuan, "Marko hian a khelh ṭhat chuan theihna sang tak a nei a, dan a harsa. Amaherawhchu khelh fuh loh ṭum a nei a, striker position-a ka khelh ve ṭhin avangin a dinhmun hi ka hriatthiam pui. Tunah hian a khelh danah a lawm a, a chhunzawm theih ka beisei," tiin an striker chu City tlarhnung su pawp tura a ṭhat tawk thu a sawi.

Stoke hi table-ah pakuanaah an awm mek a, match 27 aṭanga point 35 an hmuh tawh avangin an tlak a rinawm loh - season thara European competition khelh an tum thung ang.