Barcelona an tho leh dawn?

Champions League knockout stage chinah goal li chin phur hmasa team an tho chhuak tawh ngai lo. Barcelona chuan zanin dar 1:15 hian last 16 second leg khel turin Paris St-Germain an lo mikhual dawn a, Catalan club manager Luis Enrique chuan an tan kawng a la awm thu a sawi!

French champion PSG hian February 13 zan khan Barcelona hi 4-0 in an lo sawp tawh a, Angel di Maria-a'n goal hnih a khung bakah Julian Draxler leh Edinson Cavani ten goal khat ve ve an khung.

Barca hian Ligue 1 club lakah Champions League chanchina an chak loh chian ber ṭum an tawng. PSG tan quarterfinal lut turin goal khat an khung phawt chuan goal nga pawh an chhuah thei ang. Catalan club tan erawh a tlem berah extra time khel tur pawhin goal li tal an khung bakah goal an chhuah loh a ngai dawn.

Beiseina nung...

Zanina an inkhehna tur stadium hi mipui 99,354 lenna Nou Camp a ni. Kum 1957 aṭang khan Barcelona chuan khelmual atan an hmang a, mikhual tan hmun ralṭi a ni.

Goal li phur tawh mah se Barcelona fans an la beidawng lo a, PSG mikhual tura inbuatsaih nan banner 45 x 46 metres zeta lian an siam hem mai, banner chhunga 'In tan kan ding' tih an ziak. Hetianga banner lian hi midfielder Xavi thlah nana leh Lionel Messi-a'n Ballon d'Or chawimawina a dawn ṭumin an lo buatsaih sak tawh.

Catalan mipui te hian kartawp inkhela Celta Vigo an sawp ṭum pawhin 'Kan ring' tih chuanna banner an lo keng tawh a, hei pawh hi PSG laka hnehna chan let theih an rin vanga an siam a ni. Zanin hian fans 80,000 vel zetin an team te ti phur tura flag keng chungin mikhual an lo hmuak dawn - PSG tan huaisen a ngai khawp ang.

A tawp thleng

Barcelona manager Enrique-a'n Sporting Gijon 6-1 a an sawp hnuah season tawp ruala a hna a chawlhsan tur thu a sawi. La Liga hmahruaitu hian an manager chanchin thar an hriat hnua an match khelh hmasak berah Celta Vigo 5-0 in an sawp.

Barca hian PSG an hneh loh hnuah match li khel tawhin hnehna an chang vek a, an match hnuhnung pahnih chu Nou Camp-ah khelin goal 11 an khung a, an lamah goal khat chiah a lut. Tun season Champions League goal khung hnem ber Messi (10 goals) chuan Celta lakah goal ropui pahnih a khung bakah assists vawi hnih a nei bawk.

Kum 46-a upa Enrique chuan, "PSG paltlang turin beiseina kan la nei a, hamrik hnuhnung ber a rik thlengin kan bei ang. Team ṭha zawk kan ni tih lantir hi kan tana chona a ni a, harsa dawn hle mah se round sang zawk lut tura kawng dik kan zawh theih ngei ka beisei," tiin a sawi.

Messi, Luis Suarez leh Neymar neitu a nih avangin Spanish manager hi a zam lo.

Rinkai PSG

Arab sum hmanga siam len an nih hnuah PSG-in Ligue 1 an thunun a, kum 2013 aṭang khan tuma chuh buai phak lohin league nomawi an chawi ziah. Kuminah duhthusama ṭhain bul ṭan lo mah se champion tura rinkai an la ni tho a, hmahruaitu AS Monaco an phak lohna chu point thum chiah a ni.

A zawna season thum chhung Europe League nomawi chawi thei Unai Emery chu nikum June thla khan an lalut a, Sevilla manager hlui kaihhruaina hnuaiah Group A aṭanga tlangin last 16 first leg-ah Barcelona an sawp.

Goal li nei tawh sa mah se Emery a la thlamuang lo. PSG a enkawl hmain Emery hian Barcelona hi vawi 23 a lo hmachhawn tawh a, vawi khat bak hnehna a chang lo. Spanish manger hian Nou Camp boruak a hrechiang a, an tan fimkhur a ngaih tur thu a sawi.

Kum 45-a upa Emery chuan, "Barca hian min lehthal tumin an bei dawn tih chu thilchiang a ni a, chutiang ti thei tur chuan player pawh an nei ṭha. Minute 90 chhung boruak rit tak kan tawng dawn a, taksa bakah rilru inbuatsaihna neih ṭhat a ngai hle," a ti.

Emery chuan sawi chhunzawmin, "Team ṭha kan lenchilh dawn avanga buai tur erawh chu kan ni lo. Ka naute hian theihna sang tak an nei tih ka hre chiang a, nuam ti leh engthawl taka khelmual an luh theih a pawimawh ang," tiin a sawi.

Sevilla bakah Valencia leh Spartak Moscow pawh enkawl tawh Emery hian PSG a enkawl aṭangin inena hrang hrangah match 42 a kaihruai tawh a, vawi 38 hnehna changin ṭum riat chu an khingpuite nen an inhnehtawk - vawi li chiah chak loh a nei.