Torino-in a nghetin Hart an duh

Serie A club Torino president Urbano Cairo chuan season tawp thleng an hnena khel tura an hawh Manchester City goalkeeper Joe Hart chu loan-a a khelh theih hun chhung a tawp hunah pawh a ngheta lakluh an duh thu a sawi.

Kum 29-a upa Hart hi August 2016 khan manager thar Pep Guardiola-a'n a chhawr duh loh avangin a chhuah phalsak a ni a, English keeper hian Etihad Stadium chhuahsan hlen ai chuan loan-a khelh chhuah thlang zawkin Serie A-ah loan-in a chhuak.

Torino president Cairo chuan, "Hart hi thawhpui nuam kan ti takzet a, ani pawhin Turin khawpuia cham a hreh lo a, a duhna hi hlawhtlintir turin hma kan la thei ang," a ti a, England international goalkeeper chuan an hnena cham a hnial loh thu a sawi.

Hetihrual hian Cairo chuan Hart neitu City-ah thil thui tak a innghah thu sawi nghalin, "City thutluknaah thil a innghat thui hle. Hart hian Toro tana khelh chhunzawm zel a duh ngei ka ring a, chutiang a nih chuan City kan dawr phawt anga annin thutlukna an lo siam dawn a ni," tiin a sawi.