Indian Wells lamah player langsar

Association of Tennis Professionals (ATP) hnuaia inelna zingah Grand Slam a hluin a lian ber a, a dawttu chu Masters 1000 a ni. Nimin aṭang khan ranking hniam zawk ten Indian Wells Masters Masters 1000 qualifying an khel ṭan.

California-a neih inelnaah hian player langsar Roger Federer, Rafael Nadal, Novak Djokovic, Andy Murray, Stan Wawrinka, Milos Raonic leh Kei Nishikori te an inlan kim dawn.

World number 1 Mur­ray-a'n kum 2006 aṭang khan kum tin Indian Wells hi a la khel ziah a, kum 2009 khan final lutin Nadal a hneh lo. Kum 2007 leh 2015 khan semifinal lut mah se Djokovic hneh loin a tla.

Kum 29-a upa Murray chuan, "Indian Wells-ah hian ka ṭhat dan ber ka la lan chhuahtir thei lo, nikum khan Federico Delbonis hneh loin third round-ah ka tla. Kuminah kawng hrang hrangin inbuatsaihna ka nei nasa hle a, sulhnu ṭha hnut­chhiah ngei tumin ka inlan dawn," tiin result ṭha a duh thu a sawi.

Britain tlangval Murray hian season hmasa Masters tournament hnuhnung pahnih Shanghai Rolex Masters leh Paris Masters nomawi a chawi a, tennis a khelh hun chhungin Masters nomawi 14 a chawi tawh a, player khel lai zingah Novak Djokovic (30), Rafael Nadal (28) leh Roger Federer (24) te a tluk lo.