Chanmarians barakhaihtu Armed Veng
Mapuia Cricket League chu nimin khan khelh chhunzawm a ni a, champion lai Chanmarians-in an match hmasa bera Chhinga Veng an hneh hnuah tawlhthluin Armed Veng chu wicket ngain an ngam lo.
Chhinga Vengin an match hmasa bera hnehna an chan loh hnuah an insiamṭha nghal bawk a, 3C (Chhinga Veng sawina) hian nimin inkhel hmasa zawkah a vawi khat nana inlan Zarkawt Lords chu run 27-in an hneh.
Armed Veng ṭha zawk
Suaka Memorial Cricket Ground, Sihhmuia inkhelah Chanmarians an bat hmasa zawk a, over 17-naah run 59 chiah siamin an out vek! Chanmarians tana run siam hnem ber Lalhmangaiha'n run 28 vaw chhuakin amah hnaih bertu Lalhruaizela pawhin run 13 bak a tlin lo.
Armed Veng lamin an bowler te chet ṭhat zar zoin target huphurhawm loh tak an um a, an batsman ten beisei phak bik lo mah se opener J. Lalremruata'n run 29 a vuakchhuah hman avangin wicket nga hlohin over 13-na lekah an target hi an umpha thei a ni.
3C an tho
Chhinga Vengin an match hmasa berah hnehna an chang zo lo tih hre chungin Zarkawt Lords lakah hnehna chan ngei tumin an khel a, over 20-ah run 124 vaw chhuakin wicket kua an hloh. 3C tan opener Abhay Jaishi chuan run 25 a vaw chhuak a, run 46 siamtu Saidul Alam Fraukh lam hmaih theih a ni lo.
Sum seng hnem Zarkawt Lords-in chak turin run an mamawh hnem tih hriain khel mah se run 30 siamtu G. Lalbiakvela chu Zarkawt tana run siam hnem ber a ni a, MCL player manto ber K. Vanlalruata meuh pawhin run 18 bak a tlin lo - over 20-ah run 97 siamin an out vek a, run 27-in a tlawm zawkah an ṭang ta a ni.