Pogba-a'n a man a la phu lo - Lampard

Frank Lampard chuan Manchester United-in khawvel player manto ber ni tura an lakluh Paul Pogba-a'n a man phu khawpa a la khelh chhuah loh thu a sawi chhuak.

England midfielder hlui Lampard chuan, "Pogba hian theihna sang tak a nei ngei a, a len ṭhat bakah ball a thiam a, a chak tel bawk. Amaherawhchu United hian pound maktaduai 89 man aṭanga an beisei ang chu an la hmu lo a ni," tiin French midfielder khelh dan chu lungawina tur a la nih loh thu a sawi.

Khawvel player manto ber ken tel sawi chhunzawmin Lampard chuan, "Pound maktaduai 89 man a nih tawh chuan zirchian bik an ni a, beisei a sang zawk bawk. Tun season-a a khelh tawh chin thlir hian a ṭhatna ber hriat a la ni lo a, eng player chiah nge a ni tih a la hriat loh a, a tum dan pawh hriat thiam a ni lo. Tehna hrang hrangah a sang ber a la ni pha lo zel a ni. Paul Scholes-a angin midfield aṭanga ball vawrh kual a hna ni ta se, a man nen a inmil si lo," tiin goal tam zawk khung tura a ngaih thu a sawi.

West Ham, Chelsea leh Manchester City midfielder hlui hian Pogba sel turin record a nei ṭha a, Premier League-ah goal 177 khungin midfielder zinga goal khung tam ber a ni. Hetihlai hian Pogba erawhin tun season-ah United tan league-ah vawi 25 inlan tawhin goal li chauh a la khung a, assists vawi thum chauh a la nei bawk.

Kum 38-a upa Lampard chuan, "A kum a la naupang a, theihna a nei a, season thara a lan dan thlak danglam turin hun kan pek pawh a ṭul a ni. Pound maktaduai 89 man chuan midfield a thunun tur a ni a, hemi ti thei tur hian theihna a nei," tiin theihna a nei tih erawh a pawm thlap thung.

Manchester United hian March 9, Ningani zan dar 11:30-ah FC Rostov an hmachhawn dawn a, Europa League last 16 first leg hi Trud Stadium-ah khelh a ni ang.