Goal mamawh Dortmund

Borussia Dortmund chuan zanin dar 1:15 hian Benfica an mikhual dawn. Bundesliga club tan Champions League last 16 paltlang turin goal khat tal khung ngei ngei a ngai. Benfica hian Lisbon-ah forward Kostas Mitroglou goal khat khung hmangin hnehna an lo chang tawh.

Zanina an inkhelhna tur Signal Iduna Park hi Dortmund tan thlamuanna hmun a ni. Portuguese club an mikhual hnuhnung pangah hnehna an chang vek. Kum 1963 khan Dortmund hian 5-0 in Benfica hi an lo hneh tawh a, nikum khan FC Porto 2-0 in an lo hneh bawk.

Bundesliga lama beisei phak lo Dortmund hi Champions League-ah erawh team hlauhawm an ni. Group stage match ruk an khelh aṭangin goal 21 an khung a, hei hi Europe club te inelna sang ber group stage a goal khung hnem ber record thar a ni.

Last 16 first leg-ah erawh Dortmund hian goal an khung lo. Striker Pierre-Emerick Aubameyang chu Africa Cup of Nations khel zo hlim a nih avangin beisei angin a khel chhuak lo. Gabon international hian tunah chuan a goal khung theih a lantir leh tawh a, an match hnuhnung bera Bayer Leverkusen 6-2 a an sawp ṭumin goal hnih a khung. German international midfielder Marco Reus erawh malpui na vangin an chhawr thei dawn lo.

Benfica hian nikum khan Zenit 3-2 a hnehin last 16 an paltlang a, kuminah hian an tlang leh a nih chuan tun hnai season ruk chhunga vawi thum quarterfinal an luhna tur a ni ang.