Chennaiyin leh Materazzi an inṭhen
Indian Super League club Chennaiyin FC chuan an coach Marco Materazzi nen an inṭhen thu an sawi. Italian manager hian ISL season hmasa ber aṭangin Chennai club hi a enkawl ṭan a, season thum khelh tawhah coach dinhmun chelh vekin ISL club coach zinga a dinhmun ngai luah rei thei ber a ni.
Kum 43-a upa Materazzi hian ISL season hmasa berah player-manager dinhmun chelhin Chennaiyin hi table chung berah a awmpui a, semifinal-ah Kerala Blasters ngam loin final an lut lo thung. A season hnihnaah erawh Materazzi-a'n player ni tel tawh loa coach dinhmun chauh luah chungin Chennaiyin hi ISL nomawi a chawipui a, Mizo tlangval Jeje Lalpekhlua chuan goal ruk khungin an champion-na kawngah a thawhhlawk hle.
Player-a nih laia Italy tana World Cup nomawi chawi tawh Materazzi-a'n beiseina sang tak nen Chennaiyin-a a season thumna ṭan mah se a vawi khat nan a sang pali zingah an tel phak lo a, a hnain a tawrh phah ta a ni. Kum 43-a upa manager chuan, "Chennaiyin nena season thum chhung hun kan hman kha ka tan chuan zinkawng ropui tak a ni a, India-in football khawvela hma a sawn theihna tura tha ka thawh ve thei hi ka lawm takzet a ni. A bik takin Chennaiyin FC zinkawnga bulṭantu ka ni thei hi ka inchhuang a, team ropui tak, fans ṭha tak leh ram nuam tak chu ka mangṭha a hun ta," tiin Indian club a chhuahsan thu hi a puang.