I League Club lian Bagan leh Bengaluru inlan dawn
Vawiinah I League inkhel pahnih a awm dawn a, champion tum Mohun Bagan leh champion lai Bengaluru FC an inlan dawn. Churchill Brothers laka tlawm hlim Bagan-in Mumbai FC chu tlai dar 4:35-ah an mikhual ang a, Bengaluru-in zan dar 7:05-a khel turin Chennai City an lenchilh thung ang.
Bagan thawh hun
Mohun Bagan-in I League nomawi chawi ngei duhin season ṭan dawnah sum tam tak sengin player an lalut a, an match hnuhnung berah Churchill Brothers chu khualmualah 2-1 in an ngam lo - zaninah Mumbai lakah insiamṭhatna hun an nei dawn.
Goan club an hneh loh hlimin coach Sanjoy Sen-a'n, "Tun aia chak leh
ṭha zawka kan thawh a ngai dawn a ni. Kan hriat reng tur chu 2015-a I League nomawi kan chawi khan match thum chu kan chak lo a ni," a ti a, match khat tlawm vanga hnual mai tur an nih loh thu a sawi. Match hniha khel tlem zawk chunga hmahruaitu East Bengal point ruka phak lo mek Bagan tan an nomawi beiseina chhi nung turin zaninah chak loh a thiang dawn lo.
Mumbai an talbuai?
Santosh Kashyap-a'n Mumbai FC a zawm tirhin a sang pathum zingah tel an tum tur thu a sawi a, a beisei ang ngawt erawhin thil a kaltluang lo - match 10 chhung chu chak hmel hmu loin an awm tawh a, an match hnuhnung berah khualmualah Aizawl FC 2-0 in an ngam lo.
Mumbai coach Kashyap-a'n a sang pathum zinga tel chu mang ram mai a nih tawh thu a sawi a, table mawng lama awm hlen erawh a tum lo. Maharashtra club hian Mohun Bagan nen an inhmachhawn hmasak ṭumin goal khung loin an inhnehtawkpui tawh a, Kolkata club tan zaninah awlsam taka point thum hmuh theih a ni lo ang.
Bengaluru an tho?
I League champion lai Bengaluru FC-in coach thar Albert Roca hnuaiah beiseina sang tak nen season bul ṭan mah se Ashley Westwood-a hnuaia an ropuina ang kha an phak tawh lo a, nomawi humhim beisei ngam chi an ni tawh lo. Mahse, league match sarih chhung chak hmel an hmuh tawh loh hnuah South Indian club hian Minerva Punjab chu khualmualah 1-0 in an hneh a, chak result nena chhunzawm ngei an duh dawn - mah se a awlsam lo ang.
Chennai City hian Aizawl FC an ngam loh hnuah DSK Shivajians mikhualin chak tura ngaih an ni tawh hnuah injury time-ah goal an chhuah a, hrem vanga Mizo club hmachhawn thei lo Afghan midfielder Haroon Fakhruddin Amiri-a'n Pune club hmachhawna goal a khung nghal avangin Bengaluru tan ven uluk a ṭul ang.
Khelmual neitu
Team pahnih intawn hmasakah Bengaluru FC-in 2-0 inhnehna chang mah se Chennai-ah erawh a awlsam lo ang. Tamil Nadu club hian I League-ah point kua hlawh chhuak tawhin an point hmuh hi an khelmuala an hlawhchhuah vek a ni - an khelmualah a 'neitu' an ni tih an pholang ṭhin.
Hetihrual hian Bengaluru hi striker thar Marjan Jugovic nei hlim an ni a, Serbian striker hi Minerva Punjab an hmachhawn ṭumin a inlan tawh. India a rawn kal hma season-ah kum 33-a upa striker hian Lebanese club Al-Akhaa Al-Ahli Aley tan match 31-ah goal 18 a khung thei a, India leilungah a tlangnel a nih pawn a mak dawn lo - Chennai tlarhnung tan ven bik a sual lo ang.
Vawiin Inkhel Tur
Mohun Bagan 04:35 PM Mumbai FC
Chennai City 07:05 PM Bengaluru FC
*Inkhel pahnih hi Ten2-ah live-in pekchhuah a ni ang