Koeman ngaisangtu Williams

Everton defender Ashley Williams chuan an manager Ronald Koeman chu khawvela coach ṭha berte zinga mi a nih thu a sawi a, chhuak loin Toffees enkawl chhunzawm zel se a duhthu a sawi tel bawk.

Barcelona manager Luis Enrique-a'n season tawp rualin Barca a chhuahsan tur thu a sawi chiang tawh. Catalan club hian player a nih laia league nomawi pali leh European Cup chawi puitu an player hlui Koeman hi Nou Camp lama hruai kir an hreh lo nia sawi a ni.

Kum 32-a upa Williams chuan, "Kei leh helai hmuna a awm zawng zawng chuan Koeman hi chhuak loa cham turin kan duh. He hmun­ah hian team ṭha tak a din chho mek a, nakinah chuan khawvela club ṭha berte zinga miah a siam thei ang," tiin kum 2016 August thlaa amah laluttu manager a dahsang hle.

Williams chuan sawi chhunzawmin, "A mimal ngaihdan ka hre lo a, club ropui tak enkawl a chak a nih pawhin a mak lo ang. Mahse, kei chuan a bula awm nuam ka tiin a enkawlna hnuaia khelh a nuam ka ti a, cham se ka ti hle," a ti.

Barcelona defender hlui Koeman hian kum 2016 June thla khan Toffees hi a enkawl ṭan a, kum thum hnua a vawi khat nan Premier League-a a sang pasarih zingah a tel pui. Pathiannia Tottenham 3-2 a an hneh loh hma khan league match bikah a zawnin match kua ngawt hneh loh tawng loin an kaltluang.