Spurs an sang zel

NBA regular season kal mekah San Antonio Spurs chuan nimin zing khan Houston Rockets chu 112-110 in an hneh. Spurs hian match 49 hnehna an channa chiah a ni a, Western Conference table-ah match 52 chak tawh Golden State Warriors chiah tluk loh an nei.

Spurs tan hian Kawhi Leonard chuan court chhungah minute 39 hun a hman chhungin point 39 a score bakah rebound vawi ruk lain assists vawi nga a nei bawk. Rockets tan James Harden chuan point 39 ve tho score-in assists vawi 12 a nei bawk. A tawpah erawh ṭhiante ṭawiawmna dawng ṭha zawk Leonard chu hnehtu a ni.

Rockets hi vawi 20 an chak lohna chiah a ni a, ṭum 44 zet hnehna an chan tawh tho avangin Golden State leh Spurs hnuaiah chiah an awm chunzawm.

Inkhel dangah Golden State chuan Atlanta Hawks 119-111 in an hneh ve bawk. Warriors tan Kevin Durant chu hliam vangin a inlan thei lo chhunzawm a, kum 2015 champion tan hian Andre Iguodala chuan point 24 score-in a thawhhlawk hle.

Golden State an kal zel laiin Eastern Conference hmahruaitu Cleveland Cavaliers erawh Miami Heat lakah 106-98 in an chak lo thung.

Quicken Loans Arena-a inkhelah LeBron James-a'n point 30 score-in Kyrie Irving chuan point 32 a score bawk. Inkhelh zawha sawi zui hlawh ber erawh Andrew Bogut a ni.

Australian star Bogut hian kar hmasa Ningani khan Philadelphia chhuahsanin Cavs a zawm a, a club tana a match hmasa berah hian second 58 chiah a inlan hman tihin ke ruh tliak vangin a khel chhunzawm thei lo.