Mumang ram satliah a ni ta lo ; I League hmahruaitu Mizo club

Aizawl FC-in I League hmahruaina hun ṭha an bawhpelh lo - Thawhlehni zanah R. Laldan­mawia goal hmangin DSK Shivajians 1-0 in an hneh.

Mizo club hian point 29 an hmu a, khelh zat inangah East Bengal aiin point hnihin an sang.

Sialhawk tlangval Danmawia hian East Bengal lamah chakna goal khungin hero of the match-ah thlan a ni tawh a, Pune khawpuiah goal awm chhun khungin hero of the match chawi­mawina a dawng leh bawk.

Champion zia!
Khalid Jamil-a'n match zawn­in vawi thum starting eleven ngai a hmang a, DSK Shivajians lamah Mizoram player pahnih Jerry Lalrinzuala leh Sairuatkima ten inkhel bul an ṭan ve bawk.

DSK-in inkhel an thunun zawk a, Aizawl FC goal venhim hna an thawk. Mualneitu tan Biaklian Paite-a'n Spanish midfielder Juan Quero pass a pet fuh lo a, DSK hian goal khung theihna tur chance nei mah se hemi bak hi chance ṭha bik tiha sawi tur an nei lo.

Aizawl FC game siamtu Mahmoud Al Amna-a'n ball a chang fuh thei lo a, Mumbai FC lama goal hnih khungtu Bayi Kamo Stephane-a'n a ball hmuh apiang a hloh a, Alfred Kemah Jaryan-a'n RG Stadium-a a khelh angin midfield a thunun thei lo.

Mizo club-in chhantu a mamawh a, substitute H. Lal­muan­­kima hmangin Aizawl FC goal nawr a na deuh a, V. Lalṭanpuia luh hnuah midfield a ziaawm bawk.

Minute 85-naah MK-a thawh­rah sengin Danmawia'n chakna goal a khung. Aizawl FC-in goal an khung theih nan Ashutosh Mehta, Ṭ-a, Alfred, Eze Kingsley, Lalramchullova leh Jayesh Rane ten ball an khawih vek a, MK-a'n DSK right back Nirmal Chettri chiang zeta bumin a cross ball chu Sialhawk tlangvalin a khung. India international keeper Subrata Paul tan dan ngaihna a awm lo.

Goal luh hnuah Aizawl FC an vannei zui a, substitute Lallianzuala Chhangte goal khung tur chu keeper Albino Gomes-a'n a dang a, hemi hma hian Lunglei rawlthar hian goal ruakah a tlawh hman lo bawk. Mizo club-in Pune-ah goal an chhuah lo a, DSK Shivajians nen season hnih chhunga vawi li an inkhelh tawhah an chak vek.

Khalid-a a lawm
Aizawl FC coach Khalid Jamil chuan, "Khawi hmunah pawh kal ila, ṭantu kan nei ṭha tak kan nei zel a, hei hian phurna nasa tak min pe a ni," tiin Mizo mipui chungah a lawm.

Pune-a Mizo awm an pung-khawm ṭhahnem hle a, khual-mualah Aizawl FC-in an mual ang maiin an khelh theih phah.

DSK coach Dave Rogers chuan, "Aizawl FC khan min nawr let lo a, football khelh an tum lo. Team ṭha zawk kan ni a, champion thei dinhmuna ding laka ka naute khelh danah ka lawm," tiin an vanduai thu a sawi.

English coach Dave hian Aizawl FC hi an champion theih thu a sawi tel a, Mumbai FC coach hlui Khalid erawh a dinna ngaiah a la ding reng.

Aizawl FC coach chuan, "Champion lam kan ngaihtuah lo a, pakhatna leh pahnihna tih lam hi rilruah a awm lo. Keini chuan kan khelh leh tur hi kan ngai pawimawh a, Punjab Minerva hi team ṭha tak an nih avangin kan insiamrem vat a ngai a ni," tiin champion lam a la sawi duh lo.

Shillong an chak
Guru Nanak Stadium, Ludhiana-ah Shillong Lajong-in Samuel Lalmuanpuia leh Fabio Pena te goal hmangin Minerva Punjab 2-1 in an hneh a, mualneitu hian Kareem Omolaja Nurain penalty hmangin goal khat an khung ve bawk.

Punjab club hian Lajong an hneh loh hma hian an mualah tho Bengaluru FC lakah an tlawm tawh a, Inrinni tlai dar 4:35-ah Aizawl FC an mikhual leh nghal ang.