Bethel leh Police an vannei

MFA Cup vawi 17-naah Champhai club Bethel FC leh Aizawl club Mizoram Police ten final an lut a, March 10 hian Ṭhuam­­luaia Mualah Rs 10,000 leh nomawi an inchuh ang.

Nimina semifinal khelhah hian Bethel-in T. Lalramsanga leh substitute Christopher Lalthlamuana te goal hmangin inelna thlengtu Bazar Veng FC 2-0 in an hneh.

Inkhel hnuhnung zawkah Police leh Kolasib club Project FC te hun pangngaiah 2-2 in an inhnehtawk a, extra time-ah goal khat ve ve khung lehin penalty shootout-ah Aizawl DFA aiawh hi 5-4 in an vannei.

Kan vannei - Bula

Bethel FC coach Lalbulliana chuan, "Lunglei lam an khel ṭha zawk a, inkhelah pawh an chungnung zawk. Kan danglamna chu goal an khung loh laiin kei ni lamin goal hnih kan khung. AIFF Academy-a awm pla­yer-te an pumrua a lian ṭha a, an ṭha pui em em a, final kan lut hi kan vannei a ni," tiin Vanglaini palai a hrilh.

Bula chuan, "Sethlunah kan thleng a, kan thlenna te hian min duhsak hle. Bazar Veng nen kan inhmachhawn ṭum pawh hian ṭha takin min ṭawiawm a, kan player 12-na an ni. An chungah kan lawm takzet," tiin lawmthu a sawi.

Goal rukah a tawp lo

Project FC-in bul an ṭan ṭha a, Ricky Rohmingliana hmangin minute lina lekah an khung. Police lamin Lalfakawma hmanga minute 25-naa an chhanlet hnuah R. Vanlalhriata hmangin minute 73-naah hma an hruai leh bawk.

MPL6 khel tur Police an ṭang tluan thei lo a, minute sarih chiah khelh tur a awm tawh tihin Kolasib-in Alan Lalsawmzela hmangin an sut.

Extra time-ah goal a lut lawk lo a, minute li chiah a awm tawh tihin Alan-a'n a goal hnihna a khung a, Kolasib-in final an hnaih. Amaherawhchu injury time-ah keeper Laldanmawia a chesual a, Vanlaldika hmangin Police-in an si phurh an sut. Penalty shootout-ah Danmawia'n a tihsual siam ṭhat nan Dika penalty pet a dan sak.

Kolasib-in hnehna chang tura goal khat chiah an mamawh tawh tihin Andy Lalrinpuia pet chu VK Malsawma'n a dan sak a, Police keeper hian sudden death-ah Lalremliana penalty a dang leh bawk. Police tan veteran defender Lalrinchhana (Itana) pressure sangah a buai lo a, Kolasib keeper bumin chakna goal a khung.

Kolasib club coach Joseph Zorem­sanga chuan, "Player-te'n theihtawp an chhuah avangin ka lawm a, vanduai theihtawpa kan vanduai avangin final kan lut zo ta lo. Rahsi Vengin ṭha takin min thleng a, an chungah kan lawm hle a ni," tiin chak an phu an thu a sawi.

Mizoram Police manager B. Lalneih­sanga chuan, "Chhuan tur kan nei lo, vanneihnain min duhsak a ni. Chunglam hnathawh liau liau a ni a, Pathian khaw­ngaihna a ni," tiin an vannei tih a pawm.

Semifinal - Results
Bethel FC 2 - 0 Bazar Veng FC
BET : T. Lalramsanga 38'; Christopher Lalthlamuana 85'
Project FC 3-3 Mizoram Police FC
Penalty Shootout-ah Police 5-4 in an chak
PRO : Ricky Rohmingliana 4'; Alan Lalsawmzela 83', 116'
MIZ : Lalfakawma 25'; R. Vanlalhriata 73'; Vanlaldika 120+1'