Mohun Bagan-in point 1 sual chhuak

I League champion tura rinkai East Bengal-in Thawhlehni khan an mikhual Churchill Brothers an hneh lo. Nimin tlai khan Mohun Bagan-in an mual Rabindra Sarobar Stadium-ah Mumbai FC 2-2 in an draw hram - Aizawl FC tan result ṭha a ni.

Kolkata club hian Aizawl FC aia an khelh tlemna match pahnihah Bengaluru FC leh Shillong Lajong FC an hneh ve ve a nih pawhin Mizo club hi point khatin an la phak lo cheu ang.

Nimin tlai inkhelah Mohun Bagan hian Pritam Kotal hmangin minute 12-naah hma an hruai a, amaherawhchu Mumbai FC-in minute 20-naah Thoi Singh hmangin an sut a, Mumbaikars hian minute hnih hnuah Victorino Fernandes hmangin hma an hruai leh nghal bawk. An mualah Mariners an talbuai a, minute 89-naah Balwant Singh ṭha takin Sony Norde ball cross a tauh lut a, an inhnehtawk hram.

Sanjoy Sen-a hote hian vannei takin a tawpah point hlawh chhuak hram mah se an khelh dan thlir erawh chuan point thum hlawh chhuak tur khawpin an khel ṭha. Mizo tlangval Jeje Lalpekhlua'n vawi tam Mumbai FC tlarhnung a rum ṭhaih a, amaherawhchu Hnahthial tlangval hi goal hmaah a vannei lo.

Mumbai FC coach Kahsyap-a'n Aizawl FC an hmachhawn ṭumin a sawi lawk angin inhliam dam kawr Lalchhawnkima luhtir lo mah se, inkhelh bana a sawi angin Mohun Bagan an hmachhawn ṭumin Champhai tlangval hi inkhel bul a ṭantir. Chhawnkima telna Mumbai tlarhnung an ṭang rei hle a; nimahsela hun tawpa goal an chhuah avangin point khatah an lungawi a ṭul - Chhawnkima a khelh tluanna inkhelah Mumbai hian hneh loh an la tawng lo.

Mumbaikar hian table mawngphah chhuahsan mah se nizana Bengaluru FC leh Chennai City inkhel result a zirin an dinhmun hi danglam thei a ni.