Bayern Munich 10 - 2 Arsenal ; Wenger leh a naute an mualpho

Arsenal chu English club zingah Champions League-a chak lo chiang ber an ni ta! Bayern Munich 10-2 in an hneh lo a, a zawna season sarih nan last 16 aṭanga pet chhuah an ni. Emirates Stadium-ah Gunners hi 5-1 in an mualpho a, Allianz Arena-ah 5-1 bawkin an lo chak tawh lo bawk.

Thawhlehni zan inkhelah Arsenal tan Theo Walcott chuan minute 20-naah goal hma­hruai khungin beiseina chawk nung thar mah se second half ṭantirhah Laurent Koscielny hnawhchhuah a ni a, defender rinrawl a chhuah hnuah Gunners hian goal nga an chhuah zui.

France international Kos­cielny-a'n box chhungah Robert Lewandowski a nek tlu a, referee Anastasios Sidiropoulos chuan yellow card a pek zuk hnuah red card a phawrh leh hnuhnawh! Poland international hian ama penalty hlawhchhuah chu goal-ah a chantir. German champion tan hian Arturo Vidal-a'n goal hnih a khung bakah Arjen Robben leh Douglas Costa ten goal khat ve ve an khung bawk.

A ngaite bawk

First leg an khelh ṭum khan 1-1 a nih laiin hliam vangin Koscielny lakchhuah a ngai a, Arsenal hian goal li an chhuah belh. Second leg-ah pawh Koscielny awm loh hnuah Gunners tlarhnung a pawp.

Arsenal hian Allianz Arena-a an mualphona hliah­khuh tur chuan a tlem berah goal li tal an khung a ngai. Walcott-a'n goal a khung hma avangin an phur, England international forward hi Xabi Alonso-a'n a tlik tluk avangin penalty hmu turah a inngai, mah se pek a ni lo.

Hun tep ter tawh takah Danny Welbeck chu damlohna vangin a inkhel thei lo a, tlarhma laia awm Olivier Giroud chuan a hun ṭha neihah goal ban a tauh per. Liverpool laka bench-a ṭhut tir a nih vanga sawi zui hlawh Alexis Sanchez-a'n inkhel bul ṭan mah se beisei a phak lo a, minute 73-naan Lucas Perez-a'n a rawn thlak. Dam loh avanga a dinhmun chiang lo nia sawi Mesut Ozil pawh hun tawp dawnah tlan luhtir ni mah se awmzia a nei lo.

Arsenal hian a zawnin season ruk chhung chu last 16 an paltlang thei tawh lo a, hengah te hian group hmahruaitu an nih loh ṭhin avangin group dang hmahruaitu an hmachhawn ṭhin. Kuminah Group A hma­hruaitu niin Paris Saint-Germain chungah awm mah se tun hnai season li chhunga vawi hnih pet chhuaktu Bayern an hmachhawn a, Bundesliga hmahruaitu hian London club lakah zahngaihna lantir loin tun hma ang bawkin an pek chhuak leh.

Zahna kâwn

Season tira Arsenal fan-te beisei pakhat chu Premier League nomawi a ni a, a ṭan niah Liverpool 4-3 in an ngam lo nghal. Reds nen an intawn vawi hnihnaah pawh 3-1 bawkin an tlawm leh. Tun dinhmunah chuan Gunners hi league nomawi beisei ngam tur an ni tawh lo - hmahruaitu Chelsea nen an inthlauhna chu point 16 zet a ni tawh.

North London club hian Champions League lamah pawh beisei an phak lo mai ni loin an mualpho. Kum 1988 November thla khan League Cup inelnaah Chelsea 5-0 in an hneh lo tawh a, hemi hnuah tun ṭum hi anmahni khelmuala an chak loh chian ber ṭum a ni.

Champions League chan­chinah chak lo chiang ber dawt record an siam bawk. Bayern Munich hian kum 2009 khan Sporting Lisbon 12-1 in an lo sawp tawh a, he match tih lohah chuan tun ṭum hi Europe club liante inelnaa insawp nasat ber ṭum a ni hial!

Season tawpa contract zo ve tur manager Wenger bang tura duhtute thawm a ring zel a, stadium chhungah ngei pawh amah duh lotuten nasa takin an lantir tawh. French manager hian FA Cup-ah quarterfinal lut tawhin nomawi beiseina a la nei a, khawvela football knockout tournament upa berah hian a champion a nih pawhin Arsenal fan-te rilru a hmin zo tawh kher lo ang.

Wenger chuan, "Player 10 nih tawh chuan a harsa. Goal kan nawr a nih chuan kan khingpuiin counter attack a-

ṭangin na takin min bei thei. Kan nawr lo a nih chuan goal thun tum lo tiin min sawisel leh tho ang. Sawiselna leh deusawhna kan tawk nasa dawn tih chu hriatsa a ni a, ka ngaihdan chuan kan kim lai kha chuan kan khel chhe lo," a ti.

A hmalam hun an zawhna chu Wenger hian, "Tunah chuan football sawi hun a ni a, ka hma hun sawina tur a ni rih lo," tiin a chhang bawk.

Tun hnaiah beisei phak lo mah se Arsenal leh Wenger hi an tlusawp vek tihna a ni bik lo. Mahse, thil chiang tak erawh an elpui club lian dang ten an ṭhan san tawh a, nomawi chawi tur chuan inthlak danglam ngam an ngai.

Ancelotti a ropui

Pep Guardiola-a'n season thum chhung league nomawi a chawi pui hnuah Allianz Arena a chuahsan a, amah thlaktu Carlo Ancelotti-a'n a aia awh zo rih hle.

Italian manager kaihruaina hnuaiah Bayern hian Bun­desliga table-ah point sarihin hma an hruai mek a, nomawi humhim tura ngaih an ni tawh. Champions League lamah pawh khawvela club ṭha berte zinga mi an nih zia an lantir a, a season khatnaah nomawi pathum chawi thei dinhmunah a ding mek.

AC Milan leh Real Madrid a enkawl laia Champions League nomawi chawi tawhtu Ancelotti chuan, "Inkhel hriatthiam harsa tak a ni a, penalty kan hmuh hma kha chuan a harsa hle. Arsenal khan minute 50 chhung chu na takin min nawr a, an kim loh hnuah erawh an tan kawng a hasrsa tawh a ni," tiin an sawp team a sawichhe duh lo.

Kum 57-a upa Ancelotti chuan sawi chhunzawmin, "Thil tum chiang tak ka nei, he team hi a ṭha thei ang bera enkawl ka duh. German champion nih ka duh bakah Europe-a a ṭha ber nih ka duh bawk. Player leh fan-te hlimna turin ka theihtawp ka chhuah zel ang," a ti.