Russia khawvawtah United an zin dawn
Manchester United chuan zanin dar 11:30-ah Europa League last 16 khel turin FC Rostov an lenchilh dawn a, Russia-ah fans an ṭhat piah lamah khua a vawh ṭhin avangin mikhual team tan inkhelh a harsa ṭhin - United hmabak a ni. English club hian Russia-a an zin chauh hnu lawk March 13 zanah FA Cup quarterfinal khel turin Chelsea an lenchilh lehnghal dawn a, Jose Mourinho-a tan a naute thiam taka chhawr a ṭul ang.
United zinkawng
Manchester United tan Premier League nomawi chawi a beiseiawm tawh lo a, Champions League khel phak tur pawhin an chunga team panga chetsual an chan tel a ngai tawh - United tan Champions League khel tura kalkawng awlsam zawk nia lang chu Europa League nomawi chawi a ni.
Jose Mourinho nauten last 32-ah a thiam 16 zinga tel turin Saint Etienne chu inkhel pahnih belhkhawmah 4-0 in an hneh a, Zlatan Ibrahimovic chuan home game-ah United tana a hattrick hmasa ber siamin Henrikh Mkhitaryan chuan khualmualah goal khat a khung ve bawk.
United tan an last 32 result uan nana hman chi erawh a ni lo. Rostov hian a thiam 16 zinga tel turin Czech club ṭha Sparta Prague chu inkhel pahnihah 5-1 ngawtin an sawp thei a, United an mikhual hmaa an league match hnuhnung berah Tom Tomsk chu 6-0 ngawta an sawp bawk avangin goal khung an harsat lo tih a chiang - Red Devils tlarhnung tan fimkhur a fin thlak ang.
Tute nge Rostov?
'Russian Leicester' tia hminglem an pek Rostov hi season hmasa khan Russian Premier League-ah rin loh taka pahnihna niin Champions League an khel a, Europe club inelna sang berah erawh thleng sang zui loin an group-ah pathumna an nih avanga Europa League last 32-a tla an ni. Rostov teh nan bera hman chi erawh a ni lo - Bayern Munich, Atletico Madrid leh PSV Eindhoven te nen group khata awm ho chunga Dutch club ṭha PSV chunga an awm vanga Europa League la khel thei an ni.
Rostov hian Champions League khel tura an preliminary zinkawngah pawh Anderlecht an hneh hnuah Ajax chu inkhel pahnih belhkhawmah 5-2 in an sawp thei a, heng zinga goal li hi an muala an khung a ni. Group stage-a Bayern Munich an mikhual ṭumin German club hi 3-2 in an hneh thei bawk. Russian club hian league match an khelmuala an khelh tawhah tlawm hmel an la hmu miah lo a, an khelmuala Europe-a an match hnuhnung pasarihah vawi khat chiah an tlawm bawk. Rostov-in an khelmual an hmang thiam tih a chiang a, Mourinho naute tan mikhual khelmualah inkhelh a harsa dawn.
Rooney tel loin
United-in Russia-a inkhel turin player 20 an hruai a, Mourinho player hruai zingah tun hnaia tla tlum lo Wayne Rooney a tel lo. United captain bakah hian Eric Bailly, Luke Shaw leh Bastian Schweinsteiger te hruai tel an ni lo. Bailly hi Saint-Etienne nen last 16-a an inhmachhawn ṭuma red card a chawi avangin hruai a ni lo a, German midfielder Schweinsteiger hi hliam tenau a neih vanga hruai loh a ni a, Rooney leh Shaw hruai an nih loh chhan erawh Mourinho-a'n chhawr a tum loh hrim hrim vang niin a lang.
Red Devils tana chanchin lawmawm chu Russia pan zinga Henrikh Mkhitaryan a tel hi a ni. Armenian midfielder hian hliam vangin EFL Cup final leh kartawp Premier League-a Bournemouth an inhnehtawkpui ṭumin a hmel lan lo mah se Rostov hmachhawn turin a dam tawh. Zlatan Ibrahimovic chu Bournemouth nen an inhmachhawn
ṭuma Tyrone Mings a nghawk luih vangin match thum khel thei lo tura hrem ni mah se hrem a nihna hian English football pawn lam a huap loh avangin zaninah a inlan thei ang. Khawvel player manto ber Paul Pogba-a inlan a nih chuan Europe-a vawi 50 a inlanna chiah a ni dawn a ni.
Mourinho thukhawchang
United-in mahni khelmual hmang thiam Rostov an lenchilh dawn a, Jose Mourinho-a'n inkhel harsa an hmachhawn dawn tih a hai lo. Portuguese manager chuan, "Engti hawi zawnga ngaihtuah pawhin Rostov hmachhawn hi thil chakawm a ni lo a, kan hmaa anni kher an ding tur hi thil lawmawm lem loh tak a ni," tiin a lo sawi tawh a, Russia-ah awlsam taka chak a inring lo - United tana chanchin lawmawm tur erawh Rostov keeper rinrawl Soslan Dzhanayev chu hliam vangin a inlan theih a beiseiawm loh.
Chelsea boss hlui chuan sawi chhunzawmin, "Kan zinna a hla bawk si a, inkhelh a harsa dawn a ni. Tuna kan team dinhmun ngaihtuah phei chuan Rostov lenchilh hi a chakawm loh a, inkhel harsa tak a ni dawn ka tih chhan hi team ṭha tak kan hmachhawn dawn vang a ni. Champions League-ah pawh an zahpuiawm loh a, Bayern leh Atletico awmna group-ah awmin result pangngai tak an hlawh chhuak thei a ni," tiin an khingpui team a fak a, hetihrual hian chak result-ah lo chuan 'champion ṭhang' manager hi a lawm lo ang.