Real ropuina Ramos

Sergio Ramos-a'n a hun takah goal pawimawh khungin Real Madrid chu Napoli lakah 3-1 in hneh­na a chanpui. Champions League last 16 inkhel pahnih belh­khawmah Real hian 6-2 a hnehna changin quarterfinal an lut.

Thawhlehni zan Stadio San Paolo-a inkhelah Napoli-in goal khung an mamawh tih hriain a tir aṭangin an nawr nghal. Marek Ham­sik ball pek dawngtu Dries Mertens chuan minute 24-naah tawih zetin goal hmahruai a khung a, inkhel hmasa nen belhkhawmin 3-2 a ni.

Italian club hian na takin an nawr chhunzawm a, midfielder Hamsik-a'n goal ban hrulah a pet chhuak zui a, forward Mertens-a'n Real keeper Keylor Navas dan hman loih pet nawn mah se goal ban a per hlauh. Napoli hian goal khung theihna hun ṭha an neih pahnih hi hmang ṭangkai ni se inkhel result a danglam phah ngei ang.

Champion lai Real Madrid tan a hun takah Ramos a rawn ding chhuak. Spain international defender hian Toni Kroos-a ball pet ṭha tak chu an si phurh sut nan minute 51-naah a tauh lut. Napoli an insiam-ṭha hman lo, goal an chhuah aṭanga minute ruk hnuah Mertens chuan an mahni lamah a ti lut - Alvaro Morata chuan hun tawp hma chiahin an chak nemnghehna goal a khung bawk.

Real Madrid hian a zawnin Cham­pions League quarterfinal vawi sarih an lut ta a, Europe club liante inelnaah hian match 12 chhung zet hneh loh an tawng tawh lo. Champions League/European Cup inelnaah bikah an kal tluan rei ber ṭum a ni.

Ronaldo a bo?

Real Madrid-in inelna hrang hrangah a zawnin match 47 chhung goal an khung tawh a, Spanish club zingah goal khung zawn rei thei ber an ni.

Zinedine Zidane-a naute khelh ṭha tluang viau mah se Cristiano Ronaldo khelh danin sawi zui a hlawh. Champions League goal khung hnem ber nilai Ronaldo hian he inelna bikah match ruk chhung goal a khung tawh lo. Napoli keeper Pepe Reina a paltlang tawh hnuin goal ruakah goal ban a pet per.

Kum 32-a upa Ronaldo hian goal khung lo mah se team tan a ṭangkai thung. Tun season Champions League-ah assists vawi sarih nei tawhin a mimal record thar a ni. Napoli lakah pawh Ronaldo hi Real goal nawrna thapui a nina a bo chuang lo, hlauhawm taka ball a tlan luhpui fo bakah an goal hnuhnung ber Morata khung hi a thawhrah a ni.

Eng nge an sawi?

Napoli coach Maurizio Sarri chuan, "First hlaf kan khel ṭha takzet a, goal hnih kan khung lo kha kan vanduai. Team ṭha leh player langsar rual awmkhawm kan hmachhawn a, Sergio Ramos khan kan beiseina min chhutchhiat sak," a ti.

Real Madrid manager Zidane chuan, "Kan vanneih vang chak kan ni lo. 3-1 in hnehna kan chang, tihsual chu nei ve bawk mah ila ka naute theihna san zia kha hmuh hmaih theih a ni lo," tiin a naute khelh danah a lungawi hle.