Leicester City enkawl tur Craig Shakespeare
Premier League champion Leicester City chuan manager lailawk Craig Shakespeare hnuaia match hnih chhung a zawna hnehna an chan hnuah coach thar ruat aiin Shakespeare rin tlang an thlang a, an assistant manager ni lai hi season tawp thleng manager ni turin an ruat.
Kum 53-a upa Shakespeare hian tun hmain manager puitling dinhmun a la chelh ngai lo a, kum 2006 khan West Brom chu match khat a enkawl ve tawh! Kum 2008 khan Nigel Pearson hnungzuiin Foxes-ah assistant manager dinhmun a chelh ṭan a, Pearson-a'n 2010-11 season-a Hull City a zawm hnuin English manager hnung hi a zui chhunzawm a, 2011-a Foxes a kir leh hnuah pawh a zui zel. Mahse, 2015-16 season ṭan a nih dawna Pearson ban a nih hnuah erawh Shakespeare hi chhuak ve loin Claudio Ranieri hnuaiah assistant a nih chhunzawm a ni.
Foxes hian season hmasaa beisei loh taka champion puitu Claudio Ranieri chu tlak mai hlauhthawnawma an awm avangin an ban a, manager lailawk Shakespeare enkawlna hnuaiah Liverpool leh Hull City a zawna an hneh takah chuan khaw dang hawi an tum ta lo niin a lang. Foxes hian Ranieri hmunruak luah tur hian manager hming engemaw zat karah England boss hlui Roy Hodgson chu inbiakna an neihpui hman.
Leicester hian manager nghet ni chunga Shakespeare enkawlna hnuaia an match hmasa ber chu March 15 zanah an khel dawn a, Champions League last 16-ah first leg-a 2-1 a an ngam tawh loh Sevilla an mikhual ang.