Rafael Nadal lakah Djokovic a tlawm

French Open champion lai a ni a, world number 1 ni rei ber leh ni lai mek a ni bawk; heng nihna nei chung hian Novak Djokovic-a'n a elpui Rafael Nadal a hmachhawn a, a ṭang zo chuang lo - Roland Garros hi chu Nadal tana duan bik a ni.

Thawhlehni zan tlai tawh takah khan Paris khawpuiah Nadal leh Djokovic te an inhmachhawn, darkar li leh minute 12 an inkhelh hnuah Spanish star Nadal zawkin 6-2, 4-6, 6-2, 7-6 (7-4) in hnehna a chang.

Inkhel ṭan hun a tlai a, an zawh meuh chuan France ramah zing lam dar 1:15 a ni. Mizoramah chuan khua a var hma bawk a - Nilaini zing a ni der tawh! Player ropui leh ṭha bik inkhel entute erawh an meng thlawn lo, a hmuhnawm miau a.

Grand Slam vawi 21 champion tawh Nadal hian Zirtawpni zan dar 6:15-ah Alexander Zverev nen semifinal an khel zui leh dawn. Zverev-a'n quarterfinal inkhel dangah Carlos Alcaraz a lo hneh ve thung a ni.

Nadal a turu
June 3, Zirtawpni hian kum 36 a tling tawh dawn - tennis court chhungah erawh sakawr ṭha mi ang maiin Rafael Nadal a la che vel thei. Philippe-Chatrier-a inkhel entuten an duh ang match hmuhnawm an hmu, thawm pawh a ṭha ham ham hle.

A tirah Nadal-a'n thapui a thawh nghal, world number 1 laka hnufual chuan thawh chhuah leh a harsa tih a hriatchian vang a ni. Set hmasa berah Novak-a service vawi hnih a chhuhsak nghal, a khingpuiin break point vawi hnih a hmuh erawh a inchhanhim.

Felix Auger-Aliassime nen an inkhelh ṭuma a tihsual tam tak Nadal-a'n a siamṭha, winners vawi 57 zet a hlap chhuak - forehand na leh hlauhawm tak ang kha a nei thei leh tawh, set khat hloh ve zeuh mah se a match pumpui thlirin chak phu zawk a ni.

Season hmasa khan semifinal-ah player pahnih hi an intawng, a chak zawk Dkjokovic a champion zui. Kuminah erawh result a danglam ta chiah a, clay court inelna lian berah Nadal-a'n match 113 a khelh zinga 110 zetah hnehna a chang tling ta chiah.

A ṭha zawk
Novak Djokovic pawhin tun ṭum an inkhel bikah chuan, hnehna chan phu leh a khel ṭha zawk Nadal a chak tih a pha lo. Player pahnih intawn tawhna zawng zawng chhut erawh chuan Serbian star hi 30-29 in a la chungnung hret.

Hliam vangin kuminah Nadal-a'n tun hma a phak lo. Djokovic pawh hripui kaihhnawih vangin a inkhel tam tawk lo. French Open bikah erawh Novak hian set hloh loin quarterfinal a lut thei, ngun taka a chhut let chuan a tir lama service a hum thei lo kha a ui khawp ang.

Grand Slam vawi 20 champion tawh Djokovic chuan, "Hun pawimawh laiah Rafa kha a che fuh zawk ṭhin a, bul a ṭan fuh em em laiin kei chu a letling thawk ka ni thung, set hnihnaah khan ka khelh dan phung ka man ve ṭan chauh," a ti.

Set hnihnaah hian Nadal-a'n 3-0 a hma a hruai hnuah 3-3 in a nih rual a, set pawh a la zui. Amaherawhchu, set hnuhnung pahnihah pawh Nadal zawk a chungnung. Djokovic tan chak loh a uiawm, chutih rualin French Open-a Nadal hneh loh hi thil zahthlak a ni lo.

Hmabak Zverev
Quarterfinal inkhel hmasa zawkah Alexander Zverev chuan Carlos Alcaraz a hneh, set hloh hmasa mah se darkar thum leh minute 18 an inkhelh hnuah 6-4, 6-4, 4-6, 7-6 (9-7) in a chak - a zawnin French Open semifinal a lut.

Alcaraz hian season duhawm a hmang, a bik takin clay court-ah a khel ṭha zual. Mahse, champion tura rinkai hian Zverev lakah tihsual a ngah, unforced errors vawi 56 tehmeuh a neih chua a chak loh chhan langsar pakhat a tling.

Kum 25 mi Zverev chuan, "Inkhelh zawh hnu khan Alcaraz hnenah hei hi ka hrilh. French Open-ah hian vawi khat chauh ni loin, vawi khat aia tam a la champion ngei ang, tih hi ka hrilh a ni," tiin a khingpui Spanish player a fak hle.

German player Zverev tan semifinal a hautak dawn. Vawi 13 champion tawh Nadal nen an inhmachhawn dawn a, final lut tur chuan tihsual neih tlem a ngai khawp ang - Olympic champion hian a vawi khat nan Grand Slam title a beisei mek a ni.

Novak Djokovic hneh theih dan kawng pakhat chiah a awm, chu chu point hmasa ber aṭanga a tawp ber thlengin a ṭha thei ang bera khelh a ni tawp mai. Ka tan chuan zan hlimawm leh danglam bik
a ni," - Rafael Nadal