Tottenham an bazar ṭan: Perisic an lalut

Premier League season a zo a, transfer bazar thawm a ri nghal - Tottenham Hotspur chuan Inter Milan winger Ivan Perisic an lakluh thu an puang a, kum hnih chhung atan contract an ziahpui.

Kum 33 mi winger hian Thawhṭanni khan Spurs-ah hian medical a nei a, July 1-ah Inter-a a contract a zawh tawh dawn avangin Spurs hi free transfer-in a zawm ang.

Perisic hi Inter Milan-ah Spurs coach Antonio Conte nen an lo thawk dun tawh a, 2020-21 khan Serie A nomawi an lo chawi dun tawh - Italian football-a an hun tawn ropui kha tawn leh an tum dawn.

Perisic a lawm
Croatian winger Perisic hian season hman zawh takah khan Inter tan inelna hrang hrangah match 49 khelin goal 10 a khung a, assist vawi kua a nei bawk - a la thawhhlawk hle.

Perisic chuan, "Spurs chhungkua nena kan thawk ho thei tur hi ka lawm hle. Tottenham match hnuhnung lam kha ka lo en a, Arsenal an hneh kha chuan Champions League an khel dawn tih kha a chiang nghal tawh a ni," a ti a, Spurs hmelma kumhlun Gunners tana thu hriat nuam lo a sawi nghal.

Bayern Munich forward hlui hian, "Spurs-in Champions League an khel tur hi ka tan pawh a ṭha - inelna sang bera inlan zel hi keipawhin ka duh a ni," tiin a sawi zui a, Spurs a zawm chhanah European club football inelna sang ber an khelh tur chu a tel.

Tawnhriat nei ṭha
Perisic hi a kum tam deuh tawh mah se season hmasaa a chet dan enin Spurs tan free-a lakluh theih hi hlawkna hlang ti pawha sawi theih a ni a, a chesual viau a nih loh chuan kum hnih chhung team tan player ṭangkai tak a la ni thei dawn.

Chu mai a ni lo - Inter tan Serie A nomawi a chawi tawh bakah 2019-20 season khan Bayern Munich chu treble champion a nihpui a, Borussia Dortmund chu 2011-12 season khan Bundesliga champion a nihpui a, Croatia tan kum 2018 khan World Cup final a lo khel tawh bawk.

Perisic chuan, "Rim taka thawk ṭhin mi ka ni a, team tana tha thawh hi nuam ka ti em em. Tottenham khelh danah hian position hrang hrangah ka khel thei a, club ropui tak tak tana lo khel tawh ka nih avangin ka tawnhriat hi a chhawr theih bawk ang. Spurs tana khelh a, ka theihna zawng zawng hlan hun ka nghakhlel tawh a ni," a ti.

A la tawp lo
Conte-a'n nipui transfer-ah player leina turin pound maktaduai 150 a nei dawna sawi a ni a, a player lakluh hmasa ber free transfer-in a lalut nghal - 150 a la nei tihna a ni.

Spurs hi Southampton goalkeeper Fraser Forster nen sawizawm an ni bawk a, English keeper pawh contract hmang zo tur a nih avangin a thlawnin an lalut thei dawn.

Forster hian Spurs a zawm a nih chuan captain Hugo Lloris-a thachhang dawltu a ni dawn tihna a ni. London club second choice keeper ni lai Pierluigi Gollini hi Atalanta aṭanga an hawh a ni a, Spurs hian a ngheta lakluh theihna nei mah se amah ber hian Italy-a kir a duh thu a sawi tawh.

Thil thar
Tottenham hian player kum tam tawh lam hi hlawh hnem tak hlawh turin an lalut ngai meuh lo - mahse, club chairman Daniel Levy-a'n managing director Fabio Paratici leh Conte chungah rinna a nghat tih a lang a, Conte-a'n a duh angin transfer-ah thu a nei tih a hriat theih.

The Telegraph-in an tarlan dan chuan Ivan Perisic hian kar khatah £180,000 a hlawh dawn - Spurs-a hlawh hnem ber Harry Kane hian kar khatah £200,000 a hlawh a, a dawta hlawh hnem Son Heung-min chuan kar khatah £192,000 a hlawh.

Conte-a'n thla ruk chhungin Serie A aṭangin Rodrigo Bentancur, Dejan Kulusevski leh Perisic a lalut tawh a, a bazar lehna tur hriat a châkawm hle. Hetihrual hian Harry Winks, Giovani lo Celso leh Tanguy Ndombele te erawh chhuak tura ngaih an ni.