Champions League team of the season ; Real Madrid 4; Liverpool 4; Chelsea, City & PSG = 3
UEFA chuan Champions League khelh zawh taka team of the season a puang a, champion Real Madrid leh final-a chak zo ta lo Liverpool-ten player pali ve ve an thawh.
Real hian goalkeeper Thibaut Courtois, midfielder Luka Modric, forward Karim Benzema leh Vinícius Júnior an thawh a, Liverpool aṭangin defender pathum Trent Alexander-Arnold, Virgil van Dijk leh Andy Robertson bakah midfielder Fabinho a lang bawk.
Season hmasa champion Chelsea-in defender Antonio Rüdiger an thawh a, City aṭangin midfielder Kevin De Bruyne a lang a, Paris Saint-Germain aṭangin Real Madrid hnawltu Kylian Mbappé a lang - player pakhat ṭheuh an thawh.
Real an thiam
Carlo Ancelotti nauten Jurgen Klopp leh Pep Guardiola team angin game hmuhnawm fal phochhuak lo mah se a pawimawh ber nomawi an chawi a, a thiam 11 zinga player pali an thawh hi a awm hliah hliah.
Goalkeeper Courtois hian CL match a khel kim vek a, final-a a khel phei chu hmuhnawm a tling - Ballon d'Or hial sawi rik a ni a, team of the season-a lan a phu hle. Kum 36 ngawt ni mah se Modric a la thiam reng a, match 13-ah assist vawi li a neih bakah Real game khaikhawmtu a ni a, lan a phu.
Kum 34 mi Benzema hian match 12-ah goal 15 a khung a, final-a goal awmchhun khungtu Vinicius-a'n goal li a khung bakah assist vawi sarih a nei - anni pahnih hi team of the season-ah lang lo se sawiselna a ri ring ang.
Liverpool 4
Reds-in nomawi pali chawi an tum a, pahnihah chiah an champion - Champions League team of the season-ah erawh pali an lang a, season duhawm tak an hmang tih erawh phat rual a ni lo. Player 11 thlanchhuah zingah champion Real Madrid nen an player thawh zat a inang.
Reds hian tlarhnunga player pali thlanchhuahah pathum ngawt an thawh. Tlarhnung ven kawnga an ṭangkai tluk zeta goal nawr kawnga ṭangkai Arnold leh Robertson te an phu ang ngeiin an lang. English right back Arnold hian match kuaah goal khung lo mah se assist vawi li a nei a, left back Robertson hian match kuaah assist vawi thum a nei thung.
Virgil van Dijk awm lo se Liverpool-in Champions League final an khel kher lo ang tih tur khawpin Dutch defender a ṭangkai a, match zawng zawng khel kim vek Fabinho pawh ani aia defensive midfielder thlan tur zawk an awm lo - a phu ang ngeiin a lang.
Player dang
Nipui transfer-a Real Madrid pan tur anga sawi, Chelsea tan match kuaa goal khat leh assist vawi hnih neitu Rudiger chu tlarhnungah chhawpchhuah a ni a, Liverpool defender pathum karah a lang ve.
Midfield-ah Kevin de Bruyne a lang a, KDB hian season ṭha tak a hman rualin CL team of the season meuha lan a phu em? tih chu zawhna awm thei a ni - match 10-ah goal hnih leh assist vawi thum a nei.
PSG forward Mbappe-a'n match riatah goal ruk leh assist vawi ruk a nei a, Bayern Munich forward Robert Lewandowski (13 goals, 3 assists), Mohamed Salah (8 goals, 2 assists) leh Sébastien Haller (11 goals, 2 assists) aia thlan a ni chuan mak tih a hlawh.
Champions League team of the season (4-3-3)
Goalkeeper: Thiabult Courtois (Real Madrid)
Defenders: Trent Alexander-Arnold (Liverpool), Antonio Rüdiger (Chelsea), Virgil van Dijk (Liverpool), Andy Robertson (Liverpool)
Midfielders: Kevin De Bruyne (Manchester City), Fabinho (Liverpool), Luka Modric (Real Madrid)
Forwards: Kylian Mbappé (Paris Saint-Germain), Karim Benzema (Real Madrid), Vinícius Júnior (Real Madrid)