MSL7 hi kan hun a ni, tumahin min dang dawn lo - TKS coach

Mizoram chhunga basketball inelna sang ber Mizoram Premier League Season 7 chu nizan aṭang khan R. Dengṭhuama Hall-ah khelh ṭan a ni. Zanin hian Tuikual South leh Chawnpui te an inkhel ang.

Tuikual hian Wisconsin, USA aṭangin feet ruk leh inches riata sang Darrell Bowie an chah lut tawh a, feet ruk leh inches 11-a sang Amritpal Singh an ziak lut bawk. TKS coach Ricky Lallawmkima chuan, "MSL7 hi kan hun a ni, tumahin min dang dawn lo," tiin Vanglaini a hrilh a, zanina an khingpui tur Chawnpui thlir kanin Zarkawt BCA chu an lal ṭhuthleng aṭanga paih thlak an tum thu a sawi.

Boruak a 'hot'
Covid-19 vangin MSL6 khelh zawh a ni lo a, hun rei tak inelna neih a nih tawh loh avangin tualchhung inelna a nung thar. Pro Volleyball League-ah khan R. Dengṭhuama Hall a khat ṭha ṭhin a, a hmun ngaiah MSL khelh a ni dawn - khat zo tak maw!

Tuikual South hi veteran player F. Zodinthara'n a la ho thei a, Dina bakah hian Mizoram tana khel dang pahnih Lalnunpuia (R-a) leh Dennis Lalmuanpuia (Dede-a) te an kawl.

TKS coach Ricky chuan, "Dik tak chuan Chawnpui hi chu kan hneh ngei turah kan ngai. Kan squad hi a ṭha tawk a, Amritpal Singh kan la chahlut leh dawn. Kan hun a inher chhuak ang," tiin a ṭawng huai hle.

TKS hian hrem vangin centre Lalfakmawia an chhawr thei lo. Kanan tlangval FM-a hi match thum chhung a khel thei lo. Mahse, Tuikual South hian feet ruk leh inches riata sang Darrell Bowie an hmang thei dawn lo a, Chawnpui lakah rinkai zawk an ni ang.

Mizo hlang
Chawnpui BC hi tun ṭum MSL-a Mizo hlanga khel tur awmchhun an ni a, an hmabak apiang a hautak dawn. Chutihrualin coach Samuel Zodinpuia'n an khingpui tur Tuikual South hi a hlau tawh bik lo hle.

Samuel chuan, "MSL6-ah khan match hmasa berah tho kan inhmachhawn a, kan lead char char. Mahse ruah a sur vak a, kan player pawimawh Andre a tawlh thlu a, a khel chhunzawm thei lo. Hemi hnu hian min hneh ṭawk," tiin Vanglaini a hrilh a, TKS hi 79-78 chauha an chak avangin an vannei.

Chawnpui tan coach Samuel-a hi a hlu a, ani hi MSL hruai thlengtu a ni. Kum 2016 khan Chawnpui hi second division-ah an champion a, hetihlai hian third division-ah a la awm lo.

First division-ah pawh hun rei hmangin loin kum 2019 khan an champion a, MSL khel turin an tling. MSL an khelh hmasak berah Covid-19 vangin an khel zo thei lo a, MSL7-ah fiahin an awm ang.