India team-in training ṭan tlai dawn

India chuan June 9 aṭangin South Africa nen T20 series an khel dawn a, vawiin hian Proteas an rawn thleng dawn a, Men in Blue erawh June 5 aṭangin an training ṭan chauh ang. Thla hnih chhung awh Indian Premier League an khel zo chauh a, India player-te hian chawlh hahdam an mamawh hle.

Tun ṭum series-ah hian mipui en theih zat bituk a ni dawn lo a, player-te hi Covid-19 an kai leh kai loh en reng an ni ang a, a hranpaa khung hran erawh an ni dawn lo.

Match hmasa ber hi Arun Jaitley Stadium, Delhi-ah khelh a ni ang a; Cuttack (June 12), Visakhapatnam (June 14), Rajkot (June 17) leh Bengaluru (June 19) ah te khelh a ni ang.

Tun ṭumah hian captain Rohit Sharma bakah Virat Kolhi leh Jasprit Bumrah te hahchawlhtir an ni a, KL Rahul-a'n team a ho dawn a ni. ISL khelh zawh takah khan KL Rahul hi Lucknow Super Giants captain a ni a, a team hi playoff a thlenpui a ni.