Bayern Munich-in Raheem Sterling an duh

Manchester City forward Raheem Sterling chuan Etihad Stadium chhuahsan a pawiti lo nia sawi a awm rualin amah duhtu club an inlar nghal a, German champion Bayern Munich chu hming langsar an ni.

Bayern bakah hian La Liga club lian ho pawhin an duh niin khawthlang media-te chuan an tarlang a, media ṭhenkhat tarlan dan chuan Real Madrid, Barcelona leh Atletico Madrid ten Sterling hi lakluh an duh vek.

Kum 27 mi Sterling hian City tan season hman zawh takah khan a Premier League nomawi palina a chawi a, mahse, season khar nia an match pawimawha Aston Villa an hmachhawn ṭumin bench-ah dah a ni.

Champions League semifinal-a Real Madrid an ngam loh ṭum pawhin Sterling hi match hnihah bench-ah bul ṭantir a ni ve ve a, English forward hian squad tichhahtu ni satliah loa inkhelh tam a duh.

Liverpool aṭanga a professional career ṭantu Sterling hian season hman zawh takah khan City tan inelna hrang hrangah match 47 khelin goal 17 a khung a, assist vawi kua a nei - heng zinga match 15-ah hian bench aṭanga luhtir a ni.

City hian nipui transfer-ah thawm an nei ring hle - tunlaia striker 'hot' bera chhal ngam Erling Haaland chu Borussia Dortmund aṭangin an lalut a, Argentine forward Julian Alvarez chu River Plate aṭangin an lalut a, club chairman Khaldoon Al Mubarak chuan nipuiah player pahnih tal an la lakluh leh tur thu a sawi bawk.

Haaland leh Alvarez awm hmaa beisei anga hmun chang lo Sterling tan inkhelh tam duh chuan chhuah hi a finthlak mai thei - kum khat cham turin contract a la nei a, City tan pawh chelh a, a hnua a thlawna chân ai chuan man neia hralh theih laia chhuahtir a fuh zawkin a rinawm.

England tan vawi 74 inlana goal 19 khungtu Sterling hi Nations League khel turin Three Lions squad-ah a awm mek a, Nations League khelh zawhah a hma hun hi tichiang tura ngaih a ni - November-a World Cup squad-a tel chhunzawm a duh chuan a khelh phakna tur a pan a ṭul.

City hian nipui transfer-ah forward player pakhat tal an chhuahtir a rinawm sa hrim hrim. Sterling bakah hian Gabriel Jesus pawhin chhuah a duh nia sawi a ni a, Brazilian forward hi Arsenal nen sawizawm mek a ni.

Hetihlai hian Poland striker Robert Lewandowski chuan Sterling duhtu Bayern Munich-ah cham a tum loh thu a sawi ve bawk a, nipui transfer a 'hot' zel dawn.