Zanin dar 12:15-ah Spain Vs Portugal
UEFA Nations League season thumna chu nizan khan khelh ṭan a ni a, zanin dar 12:15 hian ram ṭha pahnih Spain leh Portugal te Benito Villamarin, Seville-ah an inkhel dawn.
Zanin dar 12:15 tho hian Czech Republic-in Switzerland an mikhual dawn bawk. Ram pali hi League A-ah group khatah an awm a, vawi hnih ṭheuh an inkhel hnua ti ṭha berin champion tur zawnna playoff an khel ang a, a ti chhe ber an relegate thung ang.
Spain team chu
Nations League hi friendly match u awrh a nih avangin khuk pui hluai chi a ni lo a, chutihrualin World Cup kum a nih avangin Qatar atana inbuatsaihna ṭha tak a ni.
Luis Enrique-a'n Euro 2020-ah Real Madrid player a ko lo a, tun ṭumah erawh Champions League final-a khel ṭha Dani Carvajal leh Marco Asensio te a ko tel.
Inhliam vanga tun season-a inlan mumal lo Ansu Fati pawh koh tel a ni a, Barcelona forward hi Lionel Messi kalsan jersey no. 10 hatu a nih avangin dah hniam a thiang lo.
Manchester United chhuanvawr David de Gea koh tel a ni lo a, Enrique hian Euro 2020 aṭang khan Unai Simon chu bul ṭantu atan a hmang. De Gea hi tun ṭumah hian squad-ah a awm pha ta lo a, amah aia thlan chu Brighton keeper Robert Sanchez leh Brentford keeper David Raya te an ni.
Spain hian Euro 2020-ah game hmuhnawm an khel a, tun ṭumah player pawimawh Barca midfielder Pedri leh Man City defender Aymeric Laporte te an khel thei dawn lo.
Mahse, Liverpool midfielder Thiago bakah Barca midfielder Sergio Busquets leh Gavi te an la awm a, game mawi khel thei turin an la ṭha tawk.
Ronaldo telna
Cristiano Ronaldo telna Portugal hi Euro 2020-ah champion rinkai zinga mi ni mah se first round-ah pathumna ni chungin knockout stage an lut hram. Amaherawhchu last 16-ah Portugal hian Belgium an hneh lo a, an champion nawn thei ta lo.
Portugal hian beisei an pha lo chhunzawm a, match pawimawhah Serbia an hneh loh avangin World Cup khel turin playoff an khelh a ṭul phah. An thiampuipa Ronaldo-a'n hun rei a nei tawh lo a, kumin hi World Cup a khelh hnuhnun ber a ni tawh ang.
Manchester United forward Ronaldo leh Portugal hian ṭha taka World Cup an khelh theih nan Nations League an khelh ṭhat hmasak hi a pawimawh a, Spain lakah fiahin an awm dawn.
Man City defender Ruben Dias chu hliam vangin a khel thei lo a, defence laiah Pepe leh Danilo te an inkawp a rinawm. Tlarhmaah Premier League-a midfielder langsar Bruno Fernandes, Bernardo Silva leh Joao Moutinho te bakah Ronaldo, Champions League final khel zo hlim Diogo Jota leh Otávio te an awm thei ang. Anni hi World Cup playoff-a Macedonia an hneh ṭuma bul ṭantute vek kha an ni.
-–––––––––––––––––––––----------------
Inlan tura beiseite
Spain: Unai Simón; Azpilicueta, Eric García, Jordi Alba; Busquets, Koke, Rodri; Gavi, Morata, Ferran Torres
Portugal: Rui Patrício; João Cancelo, Pepe, Danilo, Guerreiro; Bruno Fernandes, João Palhinha, Rúben Neves; Bernardo Silva, Ronaldo, Diogo Jota
-–––––––––––––––––––––----------------
League A
Group A1 : France, Denmark, Croatia & Austria
Group A2 : Spain, Portugal, Switzerland & Czech Republic
Group A3 : Italy, Germany, England & Hungary
Group A4 : Belgium, Netherlands, Poland & Wales
Nizan Inkhel (Result kan hre hman lo)
Poland 9:30 PM Wales
Zanin Inkhel Tur
Czech Republic 12:15 AM Switzerland
Spain 12:15 AM Portugal
June 3, Zirtawpni
Croatia 12:15 AM Austria
France 12:15 AM Denmark
Belgium 12:15 AM Netherlands
Hungary 9:30 PM England
June 4, Inrinni zan
Italy 12:15 AM Germany