UEFA leh FIFA sawiseltu Van Basten

Tun season Cham-pions League final-ah Real Madrid-in Liverpool an hneh a, inkhelh hmain zaithiam lar Camila Cabello a zai. Cuban-American singer hian Camila hian twitter kaltlangin inkhel entu mipui a sawisel a, Dutch legend Marco van Basten erawhin Camila chhanglet loin football thuneitu sang a sawisel thung.

Camilla chuan, "Kei leh ka team-ten mipui ti phur leh boruak ti nuam turin theihtawp kan chhuah. Mahse, kan zai lai khan mipuiin ring takin an club hla an sa a, hriatthiam harsa ka ti hle," tiin a lungawi loh thu a sawi chhuak.

Ajax leh AC Milan legend Marco van Basten erawhin Camilla thusawi hi a ngai pawimawh lo a, chutihrualin inkhelh hmaa Camilla a zai hi pawi a ti zawk. Netherlands striker hlui Van Basten chuan, "Football en kan duh. Mahse kan duh loh chung zai leh lam lai min thlirtir. UEFA leh FIFA hian football match hmangin pawisa siam an tum. Hetiang thil chu dah bo se, football en kan duh," tiin football thuneitu sang a sawisel.