De Jong khelh châkna Barca

Manchester United nena sawizawm Frenkie de Jong chuan Barcelona-a khelh chu a duhthusam a nih thu a sawi a, Catalan club-ah a cham chhunzawm ngei a rinawm.

Ajax aṭanga Barca zawmtu De Jong chuan, "Barcelona ka thlan avangin ka la inchhir ngai lo. Barcelona hi ka naupan lai aṭang tawha ka club khelh châkna a ni," tiin Catalan club a ngainat thu a sawi.

Kum 25 mi De Jong chuan, "Club dang nen kan inbia em tih chu sawi theih ka nei lo, thuthang chungchang sawizui ka tum lo. Barcelona hi nuam ka ti. Chutihrualin inremna kan la nei lo a, engmah chiang a la awm lo," tiin a sawi a, Man United ṭantute tan thu hriat nuam a ni lo ang.

Barca hi sum lama an buai avangin Catalan club tan De Jong chelh hi a harsa a, hetihlai hian Man United manager thar Erik ten Hag hian Ajax-ah De Jong hi a enkawl tawh avangin English club leh Dutch midfielder te hi sawizawm an ni.

Man United-in midfield tih chak nan De Jong hi mamawh viau mah se Xavi-a'n De Jong hi cham turin a duh a, Dutch midfielder berin Nou Camp nuam a tih bawk avangin English club tan lak a harsa tawh ang.