FA-in Lampard an hrem

English football-a thuneitu sang ber Football Association chuan Everton manager Frank Lampard chu Liverpool an ngam loh ṭuma a ṭawngkam avangin an hrem a, £30,000 (Rs 29,28,198.60) chawi turin an ti.

April thla tawp lam khan Premier League inkhelah Everton hian 2-0 in Liverpool an ngam lo a, he inkhelah hian Everton forward Anthony Gordon chu Reds defender Joel Matip nen ball an inchuhna lamah a tlu.

Penalty area-a thil thleng a nih avangin Everton-in penalty an beisei a, mahse, referee Stuart Attwell chuan penalty spot a kawk duh tlat lo - inkhelh zawhah na takin Lampard a ang a, player tlu chu Liverpool player ni se penalty an hmuh a rin thu a sawi.

FA lam chuan Lampard hian a ṭawngkam avangin FA rule E3 a bawhchhia tiin an sawi a, an dan behchhanah hian ṭawngkam mawi lo, midang hmuhsitna emaw uchuak taka ṭawng phal lohna thu a inziak a ni.

Lampard hian, "Penalty a ni a, mahse, Anfield-ah chuan hmuh theih a ni lo. Player tlu kha Mohamed Salah ni ta se, referee-in a pe em em ang. Matip kha Anthony lakah a foul a ni," tiin a sawi.

Everton-in penalty an beisei lai hian team pahnihin goal an la khung lo ve ve a, he thil a thlen aṭanga minute riat hnuah Andy Robertson chuan Reds goal hmahruai khungin Divock Origi chuan chak nemnghehna goal a khung bawk.

Toffees (Everton sawina) hian Merseyside derby zawhah hian Professional Game Match Officials Limited (PGMOL) te chu Anthony tlukna ennawn a nih loh chhan an lo zawt tawh.

Everton hi hun rei tak chhung Premier League tlak hlauhthawnawma an din hnuah, season tawp lamah an him hram a, table-a 16-na ni chungin season an khar.

Liverpool hian season tawp ni thlengin champion beisei mah se an champion zo ta lo a, point khata champion Manchester City phak loin season an mangṭha thung a ni.