Bale-a'n Real Madrid a thlah

Gareth Bale chuan Real Madrid a chhuahsan tur thu nemnghet a, nimin khan twitter-ah thlahna thuziak a dah.

Welsh winger Bale chuan, "Kum kua kal ta khan kum naupang takin club ka khelhna tura ka lo suangtuah ṭhin Real Madrid hi ka rawn pan. Club logo chuanna kawr var hak a, Santiago Bernabeu-a a inkhelh a, league nomawi chawi tur leh club ropuina Champions League-a champion turin ka rawn kal.

"Tunah chuan ka sulhnu ka thlir kir ang a, ka duthusam ram chu a tak ram a thleng chauh ni loin ka beisei phak bak a thleng.

"Club history-a ka lang ve tur te, Real Madrid player anga ka hlawhtlinna te hi tawnhriat ropui tak a ni a, ka theihnghilh tawh ngai lo ang," tiin a sawi a, club president, club hotute, a khelhpuite bakah amah enkawltu manager-te chungah lawmthu a sawi bawk.

Kum 32 mi Bale hian September 1, 2013 khan Real Madrid hi pound maktaduai 85.3 a zawm a, a hunlaia player manto ber a ni. Wales captain hian Real hi nomawi 16 a lakpui a, chung zingah chuan La Liga nomawi pathum bakah Chamions League nomawi panga a tel a ni.