Semifinal-ah Coco Gauff a lut

French Open ṭan hma lawk khan Coco Gauff hian high school a zo ve chauh, tunah chuan Paris khawpuia tennis inelna lianah hian semifinal a in vaw kai der tawh, kum 18 mi chauh a la nih avangin a thlen chin hi a sang viau.

Gauff hian amah ang bawka American player Sloane Stephens chu 7-5, 6-2 in a hneh. Semifinal-ah chuan Martina Trevisan nen an inkhel leh ang, Italian player hian beisei phak baka ṭhain tournament a hmachhawn ve mek bawk.

Zirna leh tennis
Gauff hian tennis a khelh pahin lehkha a zir tel. Zirna leh infiamna a kalpui thu sawiin Gauff chuan, "School kal chunga tennis khelh chu a hautak ve deuh, mahse tum tlat chuang kawng chu a awm ve tho.

"High school aṭangin diploma ka zo ve tawh a, ka tan chuan a hlu takzet," tiin a sawi. Player tam zawk chuan zirna hi an kalpui hran lo, infiamna lamah an insawrbing ṭhin, ani erawhin a theih chen chen chu a ti kawp.

Gauff hi mi danglam tak a ni, kum 14 mi chauh a nih lai aṭangin WTA Tour-ah a hming a chher der tawh. Nomawi pawh pahnih a chawi tawh, major title la chawi chiah lo mah se tunah chuan French Open semifinal hial a lut thei ta a ni.

Hunhlui a liam
Trevisan hi a naupang tawh lo, kum 28 mi lai a ni tawh. Italian player hian French Open quarterfinal a vawi khat nan a paltlang, a khingpui Leylah Fernandez chu 6-2, 6-7 (3-7), 6-3 in a hneh, hnehna a chan hnuah a nunhlui chu a liam tawh tih a sawi.

Trevisan hian insumtheih lohna a nei, a taksa tana ṭha lo tur leh mamawh aia tam a ei ṭhin a, hei vang hian kum li chhung tennis a khel lo; tun hnaiah erawh a nundan siamṭhain a lo kir a, sang takah a inhlangkai chho mek.

Trevisan chuan, "Tunah chuan ka nuam tih ber ka ti leh thei ta, nunhluite chu an liam tawh a, tunah chuan nuamti takin tennis ka khel," a ti. French Open inbuatsaih nan hian Rabat Open-ah hlawhtlinna a loa chang tawh bawk a ni.