Tih theih loh titu Barcelona

Barcelona chuan Champions League history an ziak danglam ta!

Spain champion hian first leg-a 0-4 a an ngam loh Paris St-Germain chu an khelmuaah 6-1 in an hneh lêt. Inkhel pahnih belhkhawmah 6-5 in hnehna an chang, a zawna ṭum 10 nan Cham­pions League quarterfinal an lut.

Nilaini zan inkhelah minute 88 a nih thlengin Barcelona 3-5 in an la hniam zawk. Hun tawp hma minute sarih chhunga goal thum khungin Champions League-a inlehthalna ropui ber an thlentir. Europe-a club liante inelnaah si li fai phurh hmasak zet hnua hnehna chang leh thei awm chhun chu Barca hi an ni.

European competition bika match 300 chak tling thei hmasa ber Catalan club tan hian Neymar-a'n goal hnih a khung bakah Luis Suarez, Lionel Messi leh substitute Sergi Roberto ten goal khat ṭheuh an khung - PSG tan Layvin Kurzawa-a'n an mahni lamah a tihluh bakah Edinson Cavani chuan an goal neih chhun a khung ve bawk.

Beiseina nung...
Mipui 99,354 lenna Nou Camp-ah ṭhutna awl hmuh tur a awm lo a, Catalan mipuiin an player-te beiseina nung siam turin flag nen an lo au phur.

Barca fans hian hamrik hmasa a rik aṭanga a tawp thlengin an mikhual au zam turin thawm an nei a - player 12-na (fans) te hi Luis Enrique thu sawi thlen diktirtu pakhat an ni chiang.

Midfielder ropui Xavi thlah nan leh Messi-a'n Ballon d'Or chawimawina a dawn ṭuma an lo buatsaih sak tawh angin khelmual sirah banner 45 x 46 metres zeta lian hmuh tur a awm. Banner chhunga 'In tan kan ding' tih an ziak.

"Goal li an khung theih chuan, keini chuan goal ruk kan khung thei ang," tiin inkhelh hmain Luis Enrique-a'n a sawi. Barca manager thusawi hi a tirah chuan mi rin a hlawh lo a, amah ngei pawhin a ring ngam lo hial mai thei - Mahse, a takin a thleng dik miau si!

Thiam vang
Messi, Suarez leh Neymar te tlar hmaah an intlar avangin PSG tan ven ber tur hriatthiam a harsa.

Minute thumna lekah Uruguay international Suarez hian an goal hmahruai a tauh lut. PSG defender Marco Verratti leh Marquinhos-te tihsual vang a ni. Liverpool striker hlui hian Nou Camp-a a match 64 aṭangin goal 65 a khung tawh.

Barca captain Andres Iniesta ball khen tawih zet chu defender Kur­zawa-a'n anmahni lamah tawih lo takin a dang pial lut a, second half ṭan tirhah Neymar-a penalty hlawh chhuah chu Messi-a'n harsatna nei loin an goal thum nan a khung. Brazil captain hian defender Thomas Meunier a pal zawk niin a lang! Referee Deniz Aytekin-a'n penalty spot kawk lo mah se additional assistant referee-in (goal hnunga ding referee) penalty tur a tih vanga pek an ni.

French champion PSG hian Cavani tauh luh hmangin minute 62-naah goal an khung. Catalan club tan last 16 paltlang turin a tlem berah goal thum tal khung a ngai ta.

Uruguay international hian hun ṭha neih chhunzawmin keeper Marc-Andre ter Stegen chiah a hmachhawn tawhah a paltlang lo - Cavani hian goal a khung hmain goal ban a pet per bawk.

Minute sarih chauh a awm tawh a, goal thum mamawh Barca an la beidawng lo!

Neymar chuan ball pet thiam bik a nihzia lantirin freekick a khung. Kum 25-a upa Neymar-a'n Champions League-a a goal 20-na a khung hnuah a goal 21-na ni turin Suarez-a penalty hlawh a chhuih lut zui zat.

Santos forward hlui hian a la duhtawk lo, Rafinha thlaktu Roberto goal khung tur a siamsak leh sak bawk. Goal hnuhnung ber hi free kick aṭanga chhuak niin Barca keeper Ter Stegen-a'n PSG goal area bul hnaia a hlawhchhuah a ni!

Beiseina thamral
Arab sum hmanga indin lian PSG-in Champions League nomawi an duh vangin Sevilla duhlai Unai Emery an lalut. Spa­nish manager kahhruaina hnuaiah last 16 first leg-a an mikhual Barcelona 4-0 in an sawp. Emery-a'n manager a nih hnuah Barca a hmachhawn vawi 23 hnua hnehna a channa hmasa ber a ni.

Parc des Princes-a inkhelah khan PSG hian goal khung tumin vawi 16 zet an pet a, chung zinga 10 chu target zawnah a kal. Nou Camp-ah erawh ball possession 29% chauh changin an khingpui goal zawnah ṭum thum chiah an pet. Barca aia an chungnunna chu foul tam (25-16) ah chiah a ni.

Ligue 1 nomawi kawltu hi a zawnin season li chhung Cham­pions League quartefinal aṭanga pet chhuah an nih hnuah beisei an neih san ber ṭuma ngaihah a sang pariat zingah an tel phak lo.

Barca ropuina lantirtu Emery hote hian an goal li neih an humhim theih loh avangin an nêpah a ngaih theih bawk.

League lamah pawh match 28 khelh tawh aṭanga point 62 hmuin hmahruaitu AS Monaco point thumin an phak lo - a zawna season li chhung an ta neih tawh nomawi hloh thei dinhmunah an ding mek.

Eng nge an sawi?
Barca boss Enri­que chuan, "Kan hun tawn hi thua sawifiah a harsa. Thawnthu kal­tluang satliah ni loin thawnthu danglam bik a ni. Player leh coach ka nih hnuah khatiang anga boruak nuam leh dangdai khan Nou Camp-ah hian ka tawng zen zen lo. Hnehna kan chan theihna sawifiah nana ṭha ber pakhat chu player leh fan-ten beiseina nung an neih tlat vang a ni," a ti.

PSG mana­ger Emery chuan, "Quarterfinal lut turin hun ṭha kan nei a, goal thum kan chuah hnuah goal khata kan chhan let kha chuan kan dinhmun a ṭha tawh hle. A tawp minute hnih chhung khan thi leh thau pawlhin min bei a, chu chu an chak chhan a ni. Barcelona chuan an khelmualah khatiang kha an ti thei," tiin tlawm duh lo Barca a fak.

PSG lakah hian fans bakah ball boys thlengin an ṭangrual vek a - ball chhuak reng reng pawh rang tak maiin an vawm lut nghal zel a ni!

Inlehthalna ropui chu
Nilaini zan Nou Camp-a thil thleng hi Champions League chanchina inlehthalna ropui ber a ni. Khualmuala goal an khung loh bakah goal li chhuah hnua Barcelona-in PSG an hneh let dan hi tunhma lama inlehthalna thleng tawhte aia a ropui bikna pakhat chu away goal nei lo chunga an tlang hi a ni.

Kum 2004 khan champion nomawi kawltu AC Milan chuan an mikhual Deportivo chu San Siro-ah 4-1 in an sawp. Beisei nei tawh loa ngaih Spanish club hian Italian club hi 4-0 in an hneh let! UEFA hnuaia inelnaah club dang pali chu goal li an chhuah hmasak hnua hnehna changlet thei an lo awm tawh.

Borussia Monchengladbach vs Real Madrid (1985-86 UEFA Cup) Real Madrid chuan UEFA Cup third round khel turin Borussia Monchengladbach an mikhual. German club hian first leg-ah 5-1 ngawta hnehna an chan tawh aṭangin inrintawkna sang tak nen Spain khawpui an pan. Santiago Bernabeu-ah Spanish club hian 4-0 a lo hnehin quarterfinal an lut.

Leixoes vs La Chaux-de-Fonds (1961-61 Cup Winners' Cup) Portuguese club Leixoes chu La Chaux-de-Fonds lakah 6-2 in an tlawm hmasa a, second leg-ah Swiss club La Chaux-de-Fonds hi 5-0 in an tlawm ve leh thung - Leixoes7-6 in an tlang.

Partizan v QPR (1984-85 UEFA Cup)
QPR chuan an khelmual Loftus Road-ah artificial grass an phah avangin an hmang thei lo a, home match khelh nan Arsenal khelmual Highbury an hmang. English club hian an mikhual Partizan 6-2 in an hneh. Mahse, QPR hi second leg-ah Serbian club lakah 4-0 a chak loin away goal rule hmangin an tla.