Daniel-a goal-in Bengaluru chhan zo lo
Mizo tlangval Daniel Lalhlimpuia'n Bengaluru tan Nilaini zanah goal khung mah se Bangalore club hi hnehna a chanpui zo lo.
Bengaluru hi khualmualah Chennai City nen goal khat ve ve khungin an inhnehtawk - South Indian derby-ah chak an awm loh avangin Bengaluru tan nomawi beiseina a thamral tih ngam a ni. Albert Roca enkawl team tan champion ai chuan a sang pathum zinga tel tum hrim hrim a ngai tawh zawk ang.
Bengaluru tan defender John Johnson chuan minute 53-naah an lamah a tauh lut. Chennai hlim authawm pawh a reh fel hmain minute nga hnu lawkah Daniel-a'n a sut.
Serchhip tlangval hian he goal khung tur hian fing takin Udanta Singh chu ball a pe a, Manipur winger hian Daniel-a tan cross phei lehin Chennai goalkeeper Karanjit Singh-a'n a lo khawih per a, Daniel-a tan hlah chi a ni tawh lo.
Daniel-a lawm a kim lo
Mizo tlangval Daniel Lalhlimpuia'n South Indian derby-ah goal khung mah se a team hnehna a chanpui zo lo a, a lawm a kim lo
. India Under 19 captain hlui chuan, "Goal khung mah ila ka team hi point thum ka hlawhchhuahpui zo lo a, goal khung chu nuam viau mah se lawm a kim tak tak thei lo," tiin Vanglaini palai a hrilh.
Daniel-a chuan champion beisei ngam tawh lo mah se theihtawp an chhuah chhunzawm zel tur thu sawi nghalin, "Kan I League nomawi humhim turin kan tawlhthlu hnem tawh deuh a ni mai thei a, mah se hnual phah nan erawh hman kan tum lo. Season tawp lam kan la ngaihtuah lo a, kan hmabak match zela chak hi kan tum ber chu a ni," a ti.
Bengaluru an chuai?
Kum 2013-ah Bengaluru FC din an ni ve chauh a, I League-a an season hmasa berah Ashley Westwood kaihhruainain champion nomawi an chawi nghal. Bangalore club-in an season hnihnaah an nomawi humhim zo lo mah se Federation Cup-ah an champion leh tho a, season hmasa khan kum thum chhunga a vawi hnih nan I League nomawi an chawi leh bawk.
Mahse, season hmasa zawh rualin Bangalore club leh Ashley Westwood an inṭhen a, JSW Group ta Indian club hian an English coach hi hlawh tlem zawka contract an zawrh vang nia sawi a ni. Bengaluru-in beiseina sang tak nen coach ropui Frank Rijkaard hnuaia lo intat hriam tawh Barcelona assistant manager hlui Albert Roca an lalut a, Asia khawmualpuia club inelna sang ber dawttu AFC Cup final luhpui nghal mah se I League-ah erawh beisei an phak lo takzet. Zawhna awm chu Spanish coach hi a ṭha tawk lo em ni? tih hi a ni.
Roca chhantu Daniel
Albert Roca hnuaiah Daniel Lalhlimpuia'n hmun pawimawh a chang a, Mizo tlangval hian amah ringtu coach a chhan tlat. Daniel chuan, "Ashley Westwood leh Roca hi an danglamna a awm hran lo a, tun season chu kan vanduai a ni. Season hmasaah kha chuan kan khelh ṭhat loh ṭum pawn goal kan khung mai zel a, tun season-ah erawh kan hneh viau pawhin goal kan khung thei lo," tiin Vanglaini palai a hrilh a, an vanduai ve hrim hrimah a inngai.
Chandigarh Football Academy chhuak Daniel hi tun hnaiah India coach Stephen Constantine chuan AFC Cup qualifier khel tur probables squad-ah a ko a, British coach hnuaiah Daniel-a hian India tan match khat a lo khel ve tawh. Indian Super League lama Chennaiyin FC tana khel striker chuan, "Tun hnaiah team kan chet ṭhat loh avang leh mimal tak pawha ka beisei ang ka inphak loh avangin probable squad-ah hian hmun chan phak ka inbeisei lo. Mahse, coach-in min ringtawkin min ko a, theihtawp ka chhuah ang," tiin a phur thu a sawi.