Lewis Hamilton-a'n Ferrari huphurh

Formula 1 season 71-na chu March 26 aṭangin tlan ṭan a ni dawn a, Lewis Hamilton chuan tlan chhinna an neih mek aṭanga a lan danin Ferrari car chu a tlan chak bera a rin thu a sawi chhuak!

Mercedes driver Hamilton chuan, "Ferrari hi team hlun an ni a, engtik lai mahin an beidawng ngai lo. Tun hnai season ṭhenkhatah beisei phak lo deuh mah se kuminah chuan elpui hautak ber an nih ka ring. Test kan neih aṭanga ka hmuh danin an car hi a ṭha hle a, team dang car aiin a chak ber hial maithei," tiin a sawi.

World champion vawi thum ni tawh Hamilton hian season tharah Mercedes car a khalh leh dawn a, nikum lama a teammate Nico Rosberg a chawlh tak avangin Valtteri Bottas nen an inkawp ang.

Italian team Ferrari hi For­mula 1 team zingah a hlun ber pakhat ni mah se World Constructors' Champion an nih hnuhnung ber chu kum 2008 daih tawh kha a ni a, he mi hnu lamah Red Bull leh Mercedes an tluk lo. Mercedes hi tun hnai season thum chhung chu hneh­sawh takin team champion an ni.

Kumin Formula 1 season hawn nan March 26-ah Australian Grand Prix tlan a ni anga, a hnuhnung ber atan November 26-ah Abu Dhabi Grand Prix tlan a ni ang - intlansiak 20 awm tura ruahman a ni.