Iron Mike Tyson kan hmu leh dawn ta

Kum 2005 hnua a vawi khat nan Mike Tyson chuan boxing ring chhung a rap leh dawn ta a, khawvela pa kawlhrawng ber ang hiala sawi lo ni tawh ṭhin hian Pathianni zing dar 7:30-ah Roy Jones Jr. a hmachhawn dawn. 

American fighter hi kum 54 mi a nih tawh avangin a vanglai anga fight hmuhnawm erawh beisei chi a ni lo a, a hmachhawn tur Jones Jr. pawh hi kum 51 mi a ni tawh. 

Hetichung hian Tyson chu 'Tyson' a nih miau avangin a inhnek en châk an la tam tho a, khawthlang media-ten an tarlan dan chuan pay-per-view (PPV) record a siam leh der tawh a ni. 

Tyson-a training puitu, a vanglaia welterweight boxer ropui Zab Judah chuan, "Hmana kan hmuh ṭhin Tyson kha a lo kir leh tawh. Dan chu an zam ve tak na a, a ngai pawimawhin ka ring lo," a ti!

Kum 54 mi ni tawh mah se Tyson ngaihsanna a la reh lo a, fans tam takin boxer rothap inhnek hi en an la châk - inhnek hi PPV hmanga pekchhuah tur a ni a, inhnek pechhuaktu tur Triller App-in an tarlan danin fight neih hmaa PPV hralh hnem ber record an siam. 

Tyson hian inhnek aṭang hian dollar maktaduai 10 tal a hlawh chhuak tura ngaih a ni a, an vanglai hmang mek boxer tam takin inhnek vawi khat an hmachhawnah heti zat an hlawh chhuak thei lo. 

Tyson-a hmachhawn tur Roy Jones hian dollar maktaduai thum bawr vel a hawn thung ang. Kum 20 mi lek nichunga heavyweight champion ni thei Tyson chuan, "Min hawtute chuan heti zat number hi an thlen ve theih loh avangin an buai a ni," a ti a, a PPV record chu chhuang takin twitter lamah a tarlang. 

US lamah chuan Triller leh FITE-ten online streaming hmangin inhnek hi en theih turin an pe chhuak dawn a, Triller hi India-ah an awm tawh. 

BookMyShow lamah ticket lei theih a ni dawn a, ticket lei hnuah anni lam hian online streaming hmana enna tur 'link' kha an thawn leh mai dawn a ni - ticket hi Rs. 129 man a ni a, US lamah chuan $49.99 (Rs. 3,695) hmanga lei a ngaih avangin India-a enna man zat hi chu tlawm tak a ni. 

November 29 zing dar 6:30-ah preliminary card aṭanga ṭanin inhnek en tur a awm ṭan ang a, zing dar 7:30-ah main card inhnek hi awm hman tura beisei a ni thung - Tyson-te an inhnek dawn meuh chuan tukṭhuan ei a hun tawh mai thei. 

California State Athletic Commission (CSAC) hriatpui-nain inhnek hi neih tur a ni a, round riat an inhnek ang a, round khat hian minute hnih zel a daih ang. Gram 283.495-a rit boxing glove an bun ṭhin chu gram 340.194-a ritin an thlak dawn.

Inhnek hi exhibition a nih dawn avangin boxer pahnih hi in knockout phal a ni lo a, boxer pakhat zawk a tlu a nih chuan referee-in din chhuah lehna hun pein number a chhiar dawn lo a, hetihrual hian fighter pahnih hi dinhmun hlauhthawnawma an ding a nih chuan inhnek a titawp thei ang. 

CSAC aṭang hian official judge an awm dawn hran lo a, WBC aiawh judge-ten point an lo pe thung ang - hetihrual hian official taka chak zawk puanna erawh a awm dawn lo. 

Tyson-a chanchin hrilh nawn kan ngai lo. Mi tam takin heavyweight boxer ropui bera an ngaih a ni a, WBA, WBC, IBF leh The Ring heavyweight title-te a rual vekin a lo kawl tawh. 

American fighter hian vawi 58 inhnek a hmachhawn tawhah vawi 50 hnehna a chang a, vawi ruk a chak lo zawkah a ṭang - vawi hnih inhnek chu 'no contest'-ah an puang thung.

Kum 51 mi Roy Jones Jr. hi dah hniam chi a ni bik lo - inhnek a hmachhawn tawh vawi 75-ah vawi 66 hnehna a chang thei a, vawi kua a tlawm -  weight division paliah world champion a ni thei a, kum 2018 khan Scott Sigmon hnehin a inhnek hnuhnung ber a ni.