Bethel FC hmaah Police

MFA Cup vawi 17-na final chu vawiin chawhnu dar 1:00 hian Ṭhuamluaia Mual, Lungleiah final khelh a ni dawn. Champhai club Bethel FC leh Mizoram Police inkhel hi Zonet Zawlbukah a en theih ang.

Champhai an kim lo

Bethel FC hian kumin MFA Cup hawnna inkhelah Police hi 4-0 in an sawp tawh. Hemi ṭum hian Isaac Lalrinngheta'n goal hnih a khung a, Bethel captain hian tun inelnaah goal riat khung tawhin top scorer chawimawina dawng turin a dinhmun a ṭha hle.

Champhai club hian tun inel­naah goal an la chhuah lo a, amaherawhchu final-ah tlarhnunga an kulhpui C. Lal­muanawma a inlan dawn lo. MPL5-a Chanmari FC champion puitu C. Muana hi semifinal-a Lunglei club Bazar Veng an hneh ṭumin hnawhchhuah a ni.

Bethel FC coach Lalbulliana chuan, "C. Muana hi tlarhnunga kan rinrawl a nih avangin a tel lo chuan harsatna kan tawk ngei ang. Amaherawhchu kan thawhhona a ṭha a, ṭum danga kan khelh dan anga kan khelhchhuah theih chuan hnehna kan chan ngei ka ring," tiin kim loa khelh a harsat tur thu a sawi.

SYS coach Bula chuan sawi chhunzawmin, "Police hi an danglam tawh a, kan intawn hmasak ber ṭuma kan hmachhawn ang kha an ni tawh lo. Tawnhriat an neih ṭhat bawk avangin khelh an harsa ang," tiin an hneh tawh team ni mah se Police an zuam loh thu a sawi. Champhai coach Bula hian SYS lama an hotuten chawlh an pek avanga a lawm thu a sawi tel bawk.

Police an tlo

Police-in kim loin Lunglei an pan a, match hmasa berah mualpho mah se stage sangah senior player danglamna a lang. MPL6 khel tur Police hian semifinal-ah group stage-a chak vek Kolasib club Project FC chu penalty shootout-ah an hneh.

Final thleng turin Police-in vanneihna an mamawh a, chutihrualin Project FC laka chak phu khawpin an khel ṭha. Aizawl champion harhtharna hi semifinal aṭanga inṭan a ni lo a, match hmasa bera FC Bethel an hneh loh zawh aṭangin a inṭan. Police hian knockout stage lut turin Chhim Veng leh North Gate an sawp a, goal 10 lai khungin goal an chhuah lo.

Amaherawhchu Police-in North Gate FC 6-0 a an hneh ṭum hian defender TC Vanlalhruaia chu hnawhchhuah a ni a, final-ah pawh a inlan thei dawn lo. Lunglei tlangval Hruaia bakah hian defender ṭha Lallawmzuala leh midfielder Roliantluanga chu inhliam vangin a inlan theih a rinawm loh.

Mizoram Police manager B. Lalneihsanga chuan, "Bethel hi kan hneh tawh loh an nih avangin phuba ṭha chi lak kan tum dawn a ni. Kan kim loh zia sawi chiam ka tum lo a, kan tihtur erawh kan theihna zawng zawnga khelh a ni. Final-ah hian kan tih ṭhin dan angin theihtawp chhuahin kan khel dawn. Nomawi chawi hi chu kan vanneih dan a zir a ni ang," tiin theihtawp an chhuah tur thu a sawi.

MFA Cup champion lai chu Chhinga Veng FC an ni a, hemi hma hian Champhai FC an champion. Vawiin hian Aizawl nge ding chang dawn Champhai tih a hriat ang.

Final Kalkawng
BETHEL FC
Group Stage
Mizoram Police 0 - 4 Bethel FC
BET : Kaleba Lalnunhlima 33'; C Lalremruata 36'; Isaac Lalrinngheta 78', 85'
North Gate 0 - 10 Bethel FC
BEL : H. Zonunthara 3'; Isaac Lalrinngheta 30', 32', 42', 71'; C. Lalmuanawma 45+2' (P); PC Lalengmawia 51', 85', 88'; C Lalremruata 67'
Bethel FC 2 - 0 Chhim Veng FC
BET: Isaac Lalrinngheta 45+2', 71'
Semifinal
Bethel FC 2 - 0 Bazar Veng FC
BET : T. Lalramsanga 38'; Christopher Lalthlamuana 85'
MIZORAM POLICE FC
Group Stage
Mizoram Police 0 - 4 Bethel FC
BET : Kaleba Lalnunhlima 33'; C Lalremruata 36'; Isaac Lalrinngheta 78', 85'
Mizoram Police 4 - 0 Chhim Veng FC
MPFC : Lalbiaknunga 17'; Zohmingmawia 25'; Lallawmzuala 74'; Vanlalhriata 80'
Mizoram Police FC 6 - 0 North Gate FC
MPFC : Roliantluanga 26'; Zohmingmawia 34'; TC Vanlalhruaia 38'; Lalfakawma 51',88', Lalbiaknunga 61'
Semifinal
Project FC 3 - 3 Mizoram Police FC
Penalty Shootout-ah Police 5-4 in an chak
PRO : Ricky Rohmingliana 4'; Alan Lalsawmzela 83', 116'
MIZ : Lalfakawma 25'; R. Vanlalhriata 73'; Vanlaldika 120+1'