Pacman leh Amir Khan inhnek rih dawn lo
WBO welterweight champion Manny Pacquiao promoter Bob Arum chuan Amir Khan nena inhnek turin ruahmanna thui tak kalpui tawh mah se an inrem theih loh avangin boxer pahnih chu an inhnek leh dawn rih loh thu a sawi.
Filipino boxer ropui Pacquiao-a'n twitter kaltlangin amah hmachhawntu tur thlang turin a fan-te hun a siamsak a, Amir Khan thlanchhuah a ni. Hemi hnu hian boxer pahnih hian an inhnek ngei tur thu twitter kaltlangin an puang ve ve a, tunah erawh ṭhulh leh rih a ni.
Arum chuan Los Angeles Times hnenah boxer pahnih te sum chungchanga an inrem theih loh thu a sawi a, kum 2017 chawhnu lam hma chu an inhnek a beisei tawh lo thu sawiin inhmachhawn tir ngei erawh an tum thu leh Pacquiao advisor Michael Koncz chuan Amir Khan aiawhte a dawr leh tur thu a sawi.
Pacman promoter Arum chuan, "United Arab Emirates-a boxer pahnih inhnekna tur chu ṭhulh a ni tawh. Tunah hian Pacman-a hnek tur kan buaipui mek a, Amir Khan chu a ni lo ang," tiin a sawi chiang.