MFA Cup champion Bethel FC

Bethel FC-in MFA Cup vawi 17-na final-ah Mizoram Police hnehin an champion.

Champhai club hian Ṭhuamluaia Mualah goal 19 khungin goal an chhuah lo, Lalbulliana hoten nomawi an chawi theih nan hian C. Lalremruata'n final-ah goal awm chhun a khung.

Semifinal-a Mizoram Police laka vanduai Kolasib club Project FC chuan fair play award an dawng a, Bazar Veng FC thiampuipa Edmund Lalrindika chu best player a thlan a ni. Bethel captain Isaac Lalrinngheta chuan goal riat khungin top scorer a ni bawk.

Goal 1 a tawk
Bethel FC-in inkhel bul an ṭan ṭha a, minute lina lekah coun­ter attack hmanga nawrin captain Isaac-a cross chu Police goalkeeper VK Malsawma'n a man per a, Champhai forward Remruata'n a tauh goal.

Champhai club hian group stage-ah 4-0 in Police hi hneh tawh mah se final-ah erawh Aizawl club an chungnung zawk a, darkar chanve pelh hret­ah Police forward Lalfak­awma'n hnai tak aṭangin a hlah.

Lungleiah ruah a sur nasat avangin final a hmuhnawm tawk lo a, team pahnihin ball an vawrh nasa a, goal theihna tur chance ṭha a tam lo. Police tan Zosangliana leh Fakawma ten goal an khung thei lo a, Bethel FC substitute Christopher Lalthlamuana'n a hun ṭha neih a hmang ṭangkai thei lo bawk.

Eng nge an sawi?
Mizoram Police manager B. Lalneihsanga chuan, "Vannei takin final kan lut a, final-ah erawh kan vanduai ta thung a ni," tiin Vanglaini palai a hrilh.

Bethel FC coach Lalbul­liana chuan, "Final-ah kan game kan hloh nasa a, mid­field-ah kan hneh lo, cham­pion tur hian kan vannei a ni. Champhai mipuiin min ṭawiawm ṭha a, inkhel en turin Lunglei lam pan an awm bakah in lam aṭangin min ṭawiawm ṭha a, kan player 12-na chungah hian kan lawm takzet a ni," tiin mipui chungah lawmthu a sawi.

SYS coach Bula chuan sawi chhunzawmin, "Lunglei-a kan thlenna veng Sethlunin min ṭawi­awm ṭha a, an khawtlang chungah kan lawm hle a ni," a ti bawk.

Bethel FC Champion Kalkawng
Group Stage
Mizoram Police 0 - 4 Bethel FC
BET : Kaleba Lalnunhlima 33'; C Lalremruata 36';
Isaac Lalrinngheta 78', 85'
North Gate 0 - 10 Bethel FC
BEL : H. Zonunthara 3'; Isaac Lalrinngheta 30', 32', 42', 71'; C. Lalmuanawma 45+2' (P); PC Lalengmawia 51', 85', 88'; C Lalremruata 67'
Bethel FC 2 - 0 Chhim Veng FC
BET: Isaac Lalrinngheta 45+2', 71'
Semifinal
Bethel FC 2 - 0 Bazar Veng FC
BET : T. Lalramsanga 38'; Christopher Lalthlamuana 85'
Final
Bethel FC 1 - 0 Mizoram Police
BET : C. Lalremruata 4'
Inelna Thlirna Tawi
Champion Bethel FC Rs 1,00,000
Runner Up Mizoram Police Rs 50,000
Fair Play Project FC, Kolasib Rs 10,000
Best Player Edmund Lalrindika, Bazar Veng Rs 5,000
Top Scorer Isaac Lalrinngheta, Bethel FC (Goal - 8) Rs 5,000

Champion tawhte 
Kum Champion
1999 1st Bn MAP
2000 Vaivakawn
2002 Dawrpui Vengthar
2003 1st Bn MAP
2004 FC Kulikawn leh
MRP Joint Holder
2005 FC Kulikawn
2006 1st Bn MAP
2007 FC Kulikawn
Kum Champion
2008 Lungei
2009 Khawzawl
2010 RCFC
2011 1st Bn MAP
2012 SYS FC
2013 Chanmari FC
2014 Champhai FC
2016 Chhinga Veng FC
2017 Bethel FC