India hockey team-ah Lalhlunmawii

Hockey World League Round 2, April 1-9 inkara Canada-a khelh ṭan turah Mizo nula Lalhlunmawii chu India tana khel tura koh a ni. Neihloh nula Hluntei hian India tan test match-ah Belarus a lo hmachhawn tawh a, tunah chuan khawvel huap inelna langsarah India ai a awh dawn ta a ni.

Madhya Pradesh sorkar hnuaia Gwalior Academy-a awm mek Hluntei chuan, "India tana inelna tak tak ka vawi khat hmachhawnna tur a ni a, ka phur takzet. Theihtawp chhuahin ka bei ang a, ka chunga rinna nghata min ṭan tlat ṭhintute hnenah lawmthu ka sawi bawk," tiin Vanglaini palai hnenah a phur thu a sawi.

World Hockey League Round 2 khelh turah hian Belarus, Canada, Mexico, Trinidad and Tobago, Uruguay leh Chile te nen India hi an inkhel dawn a ni.