Mizo club hmaah Minerva
Aizawl FC-in I League champion beiseina chhit nun zel tumin vawiin tlai dar 4:35 hian Guru Nanak Stadium, Ludhiana-ah Minerva Punjab an hmachhawn ang.
International match a awm dawn avangin tun round zawh hian thla khat tling ṭep chawlh a ni dawn a, hei vang hian Mizo club tan vawiina point thum hlawhchhuah hi a pawimawh lehzual dawn a ni.
I League pechhuaktu Ten 2 chuan Mizo club leh Punjab club inkhel hi tur hi live telecast tur zingah a telh lo a, live streaming hmangin I-League.org-ah a en theih thung. Inkhel dang pali erawh Ten 2-ah en theih vek ang a, zanina champion lai Bengaluru FC-in Mohun Bagan an mikhual tur hian ngaihven a hlawh hle.
Pathianni zan hian Chennai City-in tun dinhmuna Mizo club hnaih bertu East Bengal an mikhual dawn a, Tamil Nadu club hian an point 10 hlawhchhuah tawh hi an muala an hmuh vek a nih avangin Kolkata club tan zuam theih a ni lo ang.
Zuam chi loh Minerva
Minerva Punjab hian an match hmasa bera Chennai City laka point khat an hlawhchhuah hnuah a zawnin vawi li an chak lo a, league match hnuhnung pahnih an muala khelhah an chak lo bawk. Surinder Singh hote hi tun season-ah vawi ruk chak tawh lo mah se vawi nga an khingpui an draw a, Aizawl FC tan point hloh theihna an ni.
RG Stadium, Mualpuia club pahnih inhmachhawn ṭum khan injury time-a Loveday Okechukwu own goal hmangin Aizawl FC an chak hram a, inkhelah chungnung zawk mah se Mizo club an vannei tih phat rual a ni lo. Tuna Mizo club danglamna chu season ṭantirha hmuh pawimawh chang Albert Zohmingmawia'n khelhna hun a chang ta meuh lo a, R. Laldanmawia a langsar tawh thung. Defender pawimawh Lalruatthara erawh inhliam vangin a la inlan thei dawn lo a, defence vei lamah Lalramchullova'n mawhphurhna a la leh ang.
Minerva Punjab hi Aizawl an rawn zin nen an danglam tawh hle. Mizote hriat hlawh Joel Sunday-a'n Punjab club hi a chhuahsan tawh a, Asian player an nei tawh bawk. Nigerian defender Kareem Omolaja leh South Korean defender Sang-Min Kim an neih belh a, tlarhnungah Loveday a awm bawk avangin Minerva paltlang a awlsam dawn lo.
Minerva neitu Ranjit Bajaj duh danin player naupang chhawr an uar lehzual a, ISL club Chennaiyin FC aṭanga loan hmanga hawh Anirudh Thapa leh Baoringdao Bodo ten hmun pawimawh chang chhoin Mizo tlangval Lalrempuia Fanai pawh chhawr zingah a tel pha ta bawk.
Khalid a buai lo
Mumbai FC coach hlui Khalid Jamil-a'n chenna ngai loh ramah Aizawl FC a chen pui a, match 13 khelh zawha hmahruaitu an ni nachungin champion chungchang a sawi duh lo.
AFC coach Khalid chuan, "Minerva nena kan inkhel tur hi a pawimawh em em a, result ṭha neih turin kan thawhrim a ṭul a ni," tiin inkhelh hmabak zel thlir a ṭul thu Vanglaini palai a hrilh.
Champion lo tur Blues!
Bengaluru FC-in Ashley Westwood-a kaihhruaina hnuaiah season thum chhung vawi hnih an champion a, nomawi an chawi loh ṭum pawhin pahnihna an ni. Tun season-ah erawh Blues hian Albert Roca hnuaiah sum hmang tam chungin club naran an ni a, zanin hian Kanteerava Stadium hnuaiah Mohun Bagan hneh pawh ni se an champion phak a rinawm tawh loh.
Albert Roca hote hian champion rinkai East Bengal chu khualmual leh an mualah an hneh lo a, Mohun Bagan erawh tun season-ah an la hmachhawn lo. Jeje Lalpekhlua khelhna Mariners hian Mumbai FC lakah point hnih an hloh a, Bengaluru FC-in an hmelma Kolkata club champion kalkawng dal hi nuam an tih zawng tak a nih dawn avangin zanin inkhel tur hi a hmuhnawm ang.
Chennai City an lian!
RG Stadium-a Chennai City khelh dan thlir chuan I League club thar hi club tenau an ni a, amaherawhchu Soundararajan hote hi an mualah chuan club lian an ni.
Tamil Nadu club hian Barasat Stadium-ah 0-3 a an hneh loh Red and Gold hmaah defensive game an khel dawn a, Lalrindika Ralte khelhna club East Bengal hi chesual nawn thei an ni.